【朝代更替？】川田將雅領放日本騎師榜 可以捱到尾嗎？

Homan

11 April 2022 at 2:51:46 pm

雖然日本馬季只係開左四個月左右，計埋指定地方及海外賽，川田將雅現時以57場頭馬領放，帶離第二位嘅岩田望來11場。而近五屆都贏得騎師獎MVJ（Most Valuable Jockey）嘅李慕華就排第三，只得39場頭馬，落後近18場。

JRA自2013年起設有騎師獎MVJ，作為JRA冠軍騎師嘅指標。該獎項會計算JRA賽事、指定地方及海外賽。MVJ會從頭馬數、勝率、獎金及上陣次數計分，各部分頭十五名都會有分數，第一名有15分，如此類推，第十五名得1分。

現時川田喺頭馬數、勝率及獎金都排第一名，而上陣次數就較少，並唔喺前列。但如果可以保持，或者可以打破李慕華嘅壟斷。反觀李慕華現時就較為遜色，除左獎金同得勝率可以緊咬川田外，其他都落後唔少少。當然今年李慕華不但多遠征，而且仲因為遠征後成日無啦啦要停賽一至兩星期（沙特後中肺炎及杜拜後違反防疫規定），以致上陣機會減少。

新興勢力方面，兩位騎二代，岩田望來同橫山武史都係前列騎師，岩田望來勝在上陣次數相當多及頭馬都排喺第二，不過致命傷就係勝率較爭冠騎師低。而橫山武史就頭馬數字及獎金較少，如果大賽持續低迷，恐怕爭冠路上都相當難行，而且本身佢關東騎師，好嘅支持本身都較關西騎師少。

當然仲有成大半年，好多野可以發生。李慕華以往都唔係上半年大爆發嘅類型，佢通常都會係夏季賽期開始後大發神威，佢喺札幌猶如探囊取物。而且去到2歲新馬賽開始，佢嘅頭馬就會直線上升，追近榜首亦非不可能。

但嚟緊李慕華下月初會去美國騎「冠威」（Crown Pride）跑肯塔基打吡，又無左個星期下，增加其他對手拉開嘅機會。去到下半年，日本賽駒會更多遠征機會，如果到時李慕華主力為日本代表執韁，或者可能令自己爭冠路上增添變數。

今年宣布邊個做冠軍一定係言之尚早，但今年睇落係近年最有機會打破李慕華壟斷嘅機會！睇下可唔可以成功喇！

Source: JRA
Photo: HKJC