【曾受抑鬱困擾】莫雷拉:曾被壓力拖垮 冀香港馬會支援與世界接軌

Homan

5 August 2021, 2:23:10 pm

冠軍騎師莫雷拉接受Asia Bloodstock News訪問時透露,佢於2019/20馬季季尾曾受抑鬱困擾,並曾尋求馬會協助。但奈何馬會支援太少,即使最後佢鄛跨越障礙,但佢希望馬會可以與世界接軌,為騎師提供更多支援。

呢位冠軍騎師就話當時自己失去自信,同時支持比以往少。佢表示自己當時失去動力去處理任何事,同時亦希望收埋自己係黑房,最好冇光射到入黎就最好。佢曾經為此發聲,但成效甚低。Asia Bloodstock News曾詢問香港賽馬會,馬會指自己擁有一隊醫療團隊,確保騎師健康。

莫雷拉表示馬會團隊能確保身體健康,但心靈健康支援十分少。雖然馬會可以轉介心理學家比有心靈需要既騎師。但莫雷拉就話自己曾經被轉介至旺角一位心理學家,但該心理學家對賽馬毫不理解,難以協助佢走出困局。莫雷拉就表示相信該心理學家既學歷,但佢對賽馬不理解,幫助甚微。

佢話多謝馬會協助,但最終佢只係靠其妻子及兒仔支持及鼓勵,而且亦停止策騎一段時間,最終走出困局。賽馬涉及賭博,運動員不單會受到馬主、練馬師既壓力,投注人士亦都係佢地壓力來源,騎師出現心理問題亦可理解。

其他賽馬地區如澳洲,澳洲騎師協會確保每一個州都會有一個體育心理學家,確保騎師既心靈健康,爭取更好成績。而英國既騎師協會亦有設立一隊輔導員保持騎師既心靈健康。兩地不單有一隊心理學家團隊協助騎師,更重要佢地都係體育心理學家,能更有效地協助騎師走出困局。

為香港奪得兩面銀牌既何詩蓓曾經講過,「沒有壓力下比賽表現較好。比賽八成是心態,兩成是體能。」未知經過今年奧運後,馬會會唔會為香港騎師提供更多心理支援呢?

最後,壓力唔一定係運動員先有,如果發現自己突然失去動力,對身邊事物失去興趣,覺得有需要就一定要搵適當既人求助呀。

Source: Asia Bloodstock News
Photo: HKJC