【星期日岩田望來威晒】頌讚角宿輸比同一個對手三次 山茶花3勝class終於畢業

Tony

3 November 2021 at 9:24:29 am

睇完秋季天皇賞，一齊睇日本兩場重賞。

星期六日本先上演二級賽天鵝錦標，前2歲馬后「野田幻想」(Danon Fantasy)上年贏完阪神盃之後今年都跑得麻麻地，跑得近一次都係跑阪神1400阪急盃，今場回師阪神即刻發威，沿途跟住中間靚位，一入直路打開道門三兩下就控制大局，取得一哩冠軍賽優先出賽資格。
https://www.youtube.com/watch?v=Iv1aKF6T2tc

另一場係東京嘅阿堤密斯錦標，出自千代田牧場嘅Circle of Life，馬主本身係牧場社長有好嘢梗係拎嚟自肥，今場沿途留後，前面仲要有電兔喺度放頭相當岩跑，去到直路中間仲輸前面Belle Cresta同Shigeru Iwaizake三個馬位，入到200米先見李慕華撻著隻馬，幾步騎落去就過埋Belle Cresta，贏出呢場三級賽。今場啲走勢咁吸引，下場會唔會諗下阪神2歲馬女？望埋個知舍POG，結果又係冇人要，全世界一齊走寶。
https://www.youtube.com/watch?v=abv2-UcHLFk

到星期日全日重心嚟啦，阪神表列賽1800米仙后座錦標，Tony跟進馬「頌讚角宿」(Admire Virgo)又出場，武豊今年秋季天皇賞冇馬騎就騎呢隻，對住呢組對手Tony賽前都講應該得Falconia可以威脅到「頌讚角宿」；今場見「頌讚角宿」早段守到個二疊第2位睇落都唔錯，只係入直路騎落去反應麻麻地，似乎有少少讓唔起之下只得第3；Falconia本身贏過呢程，再加上岩田望來入直路識偷條欄慳位，結果魚生粥岩岩好到，對住「頌讚角宿」三次都先過對方過終點。Vin Quet Domingo就交回水準趕過「頌讚角宿」跑第2。「頌讚角宿」下場出戰中日新聞盃，希望到時可以換返個輕磅贏返場。
https://www.youtube.com/watch?v=4jN2VVLlvxI

另一場3000米3勝條件賽古都錦標，3匹出戰春季天皇賞嘅條件馬再對過，結果「山茶花」(Melody Lane)今場有輕磅之利擺住第3位，入直路得返放頭嘅Taisei Monarch要過，呢度磅位同質素分野都幾大，「山茶花」話過就過大勝而回，幕後話下場跑有馬紀念，過到投票嗰關先再講，以呢隻馬咁高人氣，叫馬迷集體投票谷到變「長山之馬」咁嘅票數唔係冇得諗；「白大兄」(Shironii)今場第3恰如其分，反而「神聖之力」(Divine Force)賽前Tony已經講佢跑法唔岩阪神短直路所以第一隻劃走，望住佢大熱開跑只能講一句「報名嘅戇居，買佢W嘅仲戇居，明知佢後上你都仲要跑阪神短直路」，轉直路彎藤岡康太拉出去十幾疊「星光速」咁嘅入彎法，呢個梗頸四，抵輸啦𡃁仔！
https://www.youtube.com/watch?v=GJbamEoxIQw

最後到知舍POG，10月完咗之後Pat Tsang放頭，Ramos跟住第2位，Tony第8位仲未贏到馬之餘仲賠了夫人又折兵，主力馬Dean's Lister傷咗要抖，都唔知點爭分。