【日經賞瑪蓮梗係必勝 艾恩全弟每日盃極速致勝】

Tony

29 March 2021, 5:02:43 pm

睇完杜拜同高松宮紀念,日本仲有三場級際賽跑咗。

未講賽事前先講新騎師,今年幾位新人繼續有好表現,同期較多座騎上陣嘅角田大和喺星期六嘅中京賽事開齋,今個星期贏夠2場頭馬。小澤大仁就贏出星期日嘅中京3勝條件賽,係同期之中最快贏到果個;古川奈穗連續3個星期有馬贏,今個星期都贏2場,不過佢喺星期日嘅中京賽事墮馬,好彩冇大礙,而肇事嘅騎師山田敬士被罰停賽兩星期。

星期六早場上演嘅三級賽每日盃,兩個一口馬主,三隻良血馬大戰,戰報之前報過嘅Lupercalia同Great Magician正面交鋒,只係Lupercalia早段跟住個快步速,跑到最後二百先無以為繼,頂到個第4已經難得;Great Magician就同另一隻一口馬Shahryar鬥足一條直路,睇住Shahryar步步壓住Great Magician先到終點,再望一望個時間,1分43秒9,破晒場地紀錄時間咁贏!Shahryar本身係「艾恩遺跡」全弟,同阿哥走每日盃條路上三冠戰線;上場喺共同通信盃拎第3反映呢組水準高,要爭皐月賞仲算係邊線份子,唔知各位看官睇完呢場使唔使秤返高少少Efforia行情呢?
https://www.youtube.com/watch?v=L3mnVoPV5tY

講起Efforia,橫山武史就已經揀呢隻馬出戰皐月賞。而佢出戰級際賽繼續強勢,星期六另一場二級賽日經賞,就係典型嘅谷草形勢:「瑪蓮必勝」(Win Marilyn)沿途守住內欄boxseat位,入到直路揀內檔發力走甩對手,取得春季天皇賞優先出賽資格;「機伶金花」(Curren Bouquetd'or)換松山弘平上陣又一次做阿二,睇住隻馬一路守住二疊,轉彎走去揀入面阻到隻Win Kiitos搞到人哋抽起都算,入到直路「瑪蓮必勝」都走甩咗,比足一條直路你都追唔到啦。松山轉彎阻到對手結果要停賽兩個星期,櫻花賞皐月賞冇得跑,可以疊埋心水嚟香港準備騎「謀勇兼備」咯!
https://www.youtube.com/watch?v=5ZMJdS-mF_k

星期日除咗高松宮紀念,中山就有泥地嘅三月錦標。李慕華心中有馬揀騎3連勝嘅「美洲種子」(American Seed)上陣,不過隻馬今場放唔出就跑到一步都冇,入到直路已經收工;反而係近仗喺中山有好表現嘅Rapier Wit,入直路睇住重磅嘅Namura Kametaro嚟過可以話大局已定,History Maker同Memory Ko一對馬留得咁後點追呀?咁就比Rapier Wit袋咗場三級賽落袋。
https://www.youtube.com/watch?v=wTqW8o_A10k

精選條件賽就有星期日嘅阪神3勝條件賽,「實搏閃鑽」(Diamant Minoru)呢隻上年菊花賞嘅參戰馬落返嚟3勝條件賽表現麻麻,跑完今場終於知咩事,原來係隻馬見水即生,繼上年喺不良場地贏出2勝條件賽挑戰菊花賞之後,今場3勝條件賽落住雨跑,就算早段留到落後面都好,入到直路沿住內欄跑結果殺晒一堆走外檔嘅對手,贏到收晒韁添。
https://www.youtube.com/watch?v=WyL2ubF2-g0