【日本7.4級地震】福島四月初賽事中止一星期 美浦未受大型破壞

Homan

17 March 2022, 9:43:32 am

日本福島縣海域琴晚當地時間11點36分發生7.4級地震,當地附近地區感受強烈震動,甚至首都圈亦感受到震動,亦有200萬戶一度停電。當地亦曾發出海嘯警告,幸而海浪並不高,未有造成嚴重破壞。

經過一日之後,各地出現不同程度嘅傷亡報告。日本中央競馬會(JRA)公布,福島競馬場受地震影響,馬場內通道及地板出現漏水,一些設施嘅牆身出現損壞。雖然買彩票嘅機未有異常,但未能確認通電狀態。另外,馬嘅隧道及跑道則未有受損。

有見及此,今週用作雙邊投注嘅福島競馬場將會關閉,以作進一步修復。考慮到要仔細檢查福島競馬場嘅損毀程度,當局決定原定喺4月9及10號福島競馬場賽事取消,意味著福島競馬場賽事嘅開鑼戰就會順延一週。

另外,位於茨城嘅美浦訓練中心亦感受一定震動。練馬師鹿戶雄一於社交媒體指佢今早有為其馬房所有賽駒做檢查,當中包括上年日本馬王,正備戰四月初大阪盃嘅「樂透心」(Efforia,エフフォーリア),佢地全部無大礙。佢指旗下今早順利按原定計劃完成晨課。

另外,鹿戶雄一亦有詢問位於福島嘅Northern Farm 天榮及位於宮城嘅山元訓練中心,兩個地方嘅人馬都安全,且設備未有受損。

截止現時為止,地震造成4死212傷,希望當地人平安。

Source: サンケイスポーツ,nikkansports
Photo: @EN_NERV