【日本3場G3各自精彩】

Tony

21 July 2021, 2:41:06 pm

星期六先舉行今季第一項2歲重賞函館2歲錦標,結果喺2歲戰線先拔頭籌嘅係幾年都唔發市一次嘅奈村系,泉谷楓真呢位上年出道嘅新人騎Namura Lycoris呢匹馬女沿途守第4位,入直路一開門就過晒一對放頭馬輕鬆取勝。馬就仲可以進步落去,騎嗰個一出道Tony就評過前途無可限量,而家先贏重賞亦不算意外。
https://www.youtube.com/watch?v=KGxAlGDKBaU

星期日就有兩場三級賽,首先開跑嘅函館紀念,細佬橫山武史憑一隻「樂透心」威足上半年,今次到大佬橫山和生威威啦,上年贏過新潟大賞典嘅「東瀛天照」(Tosen Surya)今場醒晒,沿途守住第3位由得前面一對馬鬥放,再到轉彎踩油擺脫對手控制大局,贏成3個馬位返嚟,一氣呵成,之後會跑新潟紀念,睇嚟幕後對夏季系列個獎金都幾有信心;初次跑草地嘅二月錦標盟主Cafe Pharoah,全程無段好睇,一揹住個58.5公斤跑結果就同2年前今日一樣,唔見咗人囉!咁下場回師泥地好定係繼續跑札幌紀念呀?
https://www.youtube.com/watch?v=rjgaqpT4ZkA

跟住就跑中京紀念,小倉1800米重賞自北九州紀念之後都有十幾年冇跑過,因為小倉冇1600米所以今場增程200,但仍然係夏季一哩系列嘅一部份。Andraste比岩田望來撻Q撻咗2場之後回配川田將雅兼揹少1公斤即刻歸位,3檔起步守住條欄唔使好似上次人魚錦標咁外檔起步全程望空,入到直路輕鬆爆甩「民族服裝」(Dirndl)直奔終點,喺個系列賽入面先拎10分,同今場有份出賽跑第5嘅Lotus Land一齊領先。
https://www.youtube.com/watch?v=qWcxAwoh_JU

最後到POG消息,先報一隻知舍POG冇人揀嘅良血馬。「迪雅卓」全弟Lubeck,2020年Select Sale週歲價6000萬(未包稅),由金子真人買入,擺去須貝尚介度練。佢喺星期日嘅函館1800米賽事中初出,見吉田隼人沿途慢放,對面直路開到26秒幾仲要冇馬中段踩油,結果一放到底。不過Tony嫌隻馬今場走勢有少少唔規矩,轉彎入直路嗰下外閃,只係吉田隼人修正得夠快,跟住再爆一段後面冇馬跟到上嚟,咁有潛力嘅馬值得留意。
https://www.youtube.com/watch?v=Mwg9t0gfdPw

講返知舍POG比賽,有參賽者今個星期成功開齋,Roy名下嘅Kona Black外型同父系「北部玄駒」一樣都係白鼻樑,難怪Sunday會決定擺清水久詞度練;上場初出贏唔到之後留到星期日嘅小倉1800米未勝利賽中上陣,沿途擺前走四疊,入直路都爆贏全程慳咗好多位嘅Alain Verite,幫Roy賺咗510分。
https://www.youtube.com/watch?v=kPVILpTIlns