【日本馬王雍容白荷】

Tony

JRA賞今日開會之後公佈獎項,「雍容白荷」當選馬王。

JRA今日開會傾2019年度JRA賞,結果就隨即公佈,「雍容白荷」當選為日本馬王兼最佳4歲上雌馬,不過佢只得271票唔係全票當選,「杏目」同Chrysoberyl喺馬王投票上分別得到2票同1票。而4歲上雌馬「杏目」係有3票。

網上爭議最大嘅4個獎項,櫻花賞盟主「放聲歡呼」得到最佳3歲雌馬獎,即使上年三冠由唔同馬勝出,但係全年得佢贏過年長馬,得票比「唯獨愛你」多22票 (121:99),至於「創世駒」就有47票。

最佳3歲雄馬落喺「農神節慶」手上,憑皐月賞冠軍加有馬紀念亞軍嘅戰績攞獎,得票比贏NHK一哩盃同香港一哩錦標嘅「頌讚火星」多17票 (124:107)。「頌讚火星」贏香港一哩錦標都影響唔到年內春秋一哩全勝嘅「冠軍車手」拎到最佳短途馬獎,而且得票亦都一面倒 (211:38)。

最佳4歲上雄馬就由「勝出光采」得到,即使只係贏香港2場一級賽,不過女皇盃贏馬王「雍容白荷」就唔同講法。至於得票就同「冠軍車手」相差唔遠 (136:118)。

2歲馬方面,Contrail成為首匹希望錦標盟主拎到最佳2歲雄馬,以197:77擊敗朝日盃未來錦標得主Sailos;Resistencia全票拎最佳2歲雌馬。Chrysoberyl以不敗戰績當選最佳泥地馬,不過Omega Perfume都有4票唔係全票當選。連贏三年最佳跳欄馬獎項嘅「長山之馬」今年終於輸比贏中山大障礙嘅Shingun Michael,得票亦都大跌 (175:95)。