Homan

11 January 2022 at 7:28:14 am

日本中央競馬會（JRA）今日公布2021年各個馬匹獎項，由296位記者投票選出，結果都算幾正路。

以三歲雄馬身份攻下皐月賞、秋季天皇賞及有馬紀念賽嘅「樂透心」（Efforia，エフフォーリア），以277票順利榮登2021年日本年度代表馬寶座，擊敗18票嘅「唯獨愛你」（Loves Only You，ラヴズオンリーユー）及 1票嘅Marche Lorraine（マルシュロレーヌ）。「樂透心」繼2011年「黃金巨匠」（Orfevre，オルフェーヴル）以黎，再有三歲雄馬登上日本馬王寶座。佢同時亦以296票（全票）當選最佳三歲雄馬。相信馬迷對此亦唔會太意外。

而最佳三歲雌馬方面，雖然喺冠軍盃同秋華賞大敗，但白毛馬Sodashi（ソダシ）仍然以234票贏得最佳三歲雌馬，睇黎上年嘅櫻花賞冠軍同喺札幌紀念賽擊敗「唯獨愛你」幫佢搶到唔少票。

年長馬方面，雖然全年只得一場一級賽日本盃落袋，但佢喺日本馬迷及賽馬記者心目中仍有相當大嘅份量，講緊嘅就係2020年三冠馬「鐵鳥翱天」（Contrail，コントレイル），佢以282票贏得最佳年長雄馬獎。

而競爭相當激烈嘅最佳年長雌馬獎，最終就由「唯獨愛你」以251票贏得，擊敗攞到31票嘅「放聲歡呼」（Gran Alegria，グランアレグリア）及 11票嘅「創世駒」（Chrono Genesis，クロノジェネシス）。「唯獨愛你」上年三場一級賽都係日本以外地區贏得，包括香港嘅女皇盃及香港盃，另外仲有美國嘅育馬者盃雌馬草地大賽。

而最佳短途馬獎，就由「放聲歡呼」以284票贏得，上年佢贏得兩場一哩一級賽，包括維多利亞一哩賽及一哩冠軍賽。而安田記念賽就得亞軍。另外短途馬錦標冠軍「妙發靈機」（ピクシーナイト，Pixie Knight）就有10票。

最佳泥地馬獎就由 T O Keynes（テーオーケインズ）以240票贏得，該駒於帝王賞及冠軍盃兩項泥地大賽都贏馬而回。而Breeders' Cup Distaff冠軍Marche Lorraine就比較可惜，只得47票，未能贏得最佳泥地馬獎。而JRA亦未有安排特別獎比Marche Lorraine。

最佳跳欄馬就由中山大障害重返勝門嘅「長山之馬」（Oju Chosan，オジュウチョウサン）贏得，票數為166票，僅比中山Grand Jump冠軍Meisho Dassai（メイショウダッサイ）多39票。

而兩歲馬獎項方面，朝日盃未來錦標冠軍 Do Deuce（ドウデュース）以251票贏得最佳兩歲雄馬，比希望錦標冠軍Killer Ability（キラーアビリティ）多200幾票，似乎幫到武豊贏到呢場一級賽為Do Deuce搶到唔少票。而最佳兩歲雌馬就由阪神JF 冠軍 Circle of Life（サークルオブライフ）以接近全票嘅294票贏得。



Source: JRA
Photo: 有馬紀念賽截圖