【掃下貨先】香港馬會花近千九萬於殷利殊澳洲復活節拍賣會入貨

Homan

7 April 2022, 12:27:22 pm

澳洲前日同琴日一連兩日舉辦殷利殊澳洲復活節週歲馬拍賣會,為其中一個澳洲重要嘅週歲馬拍賣會。除左唔少大馬入貨外,香港馬會亦購入五匹週歲馬。

先講全個拍賣會,拍賣會標王係「日光輝映」(Sunlight)嘅全弟,為出自Solar Charged嘅雄馬,以三百萬澳元(約一千七百五十萬港元),由古摩亞投得。而另一匹高額馬同樣由古摩亞投得,以二百二十五萬澳元(約一千三百萬港元)投得,為2018年金拖鞋大賽冠軍「耀天集」(Estijaab)嘅全弟。成個拍賣會古摩亞投得六駒,全數成交價都係七位數澳元,總數使咗一千零三十萬澳元(約六千萬港元)。

而香港買手方面,佢地合共投得十三駒。當中香港馬會投得五駒,最高成交價為一匹出自「摘星勇驥」(Zoustar)嘅幼駒,成交價為一百萬澳元(約五百八十萬港元)。該匹雄馬為維多利亞賽馬會育馬錦標亞軍「鏡中人物」(Man In The Mirror)嘅半弟。另外仲有「旺蝦王」的外甥、出自多項短途級際賽冠軍Whispering Brook嘅雄馬、紐西蘭火車路錦標冠軍Santa Monica全弟及短途二級賽冠軍「一彈中的」(Single Bullet)全弟。相信呢幾匹會喺黎緊嘅ISG拍賣會見到。

除左香港馬會外,出價最高嘅香港買手係Asian Bloodstock Services,以九十萬澳元(約五百二十萬港元)投得。母系Total Attraction服役時曾於滿利谷1600米二級賽跑入亞軍,而呢匹出自「摘星勇驥」嘅雄馬為2019二級賽Moreton Cup(東奔,1200米)冠軍Pretty In Pink嘅半弟。根據馬會紀錄,最近以Asian Bloodstock Services Ltd (HK) 引入嘅兩匹賽駒,為「大把獎金」及「三劍俠」,兩駒皆未贏馬。


Source: @inglis_sales
Photo: @inglis_sales