【拉丁城市贏阪急盃 Hishi Iguazu中山紀念4連勝】

Tony

今個星期係日本騎練牌照結算日,辭官歸故里者為數不少。

騎師方面除咗蛯名正義轉任練馬師之外,跳欄騎師佐久間寛志亦都交牌;8位引退練馬師中,星野忍同松田國英都有頭馬進賬。

賽事方面就有兩場級際賽舉行,阪神嘅阪急盃,打算出戰高松宮紀念嘅「冠軍車手」拎今場熱身,福永祐一轉彎飛到出五疊跑都知輸咗九成,人哋「拉丁城市」(Resistencia)已經走甩晒,你仲要孭重磅差3公斤,讓唔讓得起先?結果後上不及只得梗頸四,如果呢場係一級賽,福永燉咗冬菇九世啦!至於「拉丁城市」今場起步夠快就咁一放到底,破埋場地紀錄時間贏出呢場三級賽,取得高松宮紀念嘅優先出賽資格。
https://www.youtube.com/watch?v=JcLKjhz1F_U

至於二級賽中山紀念,前面「巴氏金屬」(Babbitt)放到咁快就益晒跟喺主馬群嘅一對金盃盟主包辦一Q,中山金盃盟主Hishi Iguazu力壓京都金盃盟主Cadence Call取得4連勝,同時拎埋大阪盃優先出賽資格。今場松山弘平輕鬆擺隻馬喺主馬群最前面,入到直路步步追住Cadence Call同Win Exceed到終點前先過晒,表現出色,只係要睇埋三冠馬后「謀勇兼備」(Daring Tact)部署先知松山弘平會騎邊隻跑大阪盃;Cadence Call今場初跑右轉幾乎得手算有交代,之後返一哩路程睇好佢發展。至於星期日贏得2場頭馬嘅蛯名正義,今場策騎「直指頂峰」(Go for the Summit)跑第4,以呢隻下風馬嘅表現嚟講可以話超額完成,希望蛯名明年開倉亦都可以「直指頂峰」。
https://www.youtube.com/watch?v=8H0ra9Qpk-I

3歲賽事就有星期日舉行嘅堇菜錦標,3戰2勝嘅Deep Monster賽前又釘甲起步又漏閘,仍可以輕鬆贏出呢場2200米表列賽。呢組計進度暫時得佢贏過1勝條件賽,跑落去未受太大考驗,嚟緊三冠武豊應該會喺呢隻同Yoho Lake二揀一,但係睇完今場Deep Monster表現,要揀邊隻都應該呼之欲出掛?
https://www.youtube.com/watch?v=NID8CCNMrTs

未勝利及條件賽就有3場跟進,星期六阪神先舉行3勝條件賽3200米嘅松籟錦標,係之後5月舉行嘅春季天皇賞測試賽,仲以為得小貓三四隻跑結果都有14匹馬上陣。全場唯一跑過3200米、1月贏完2勝條件賽嘅「山茶花」(Melody Lane)全程居後,末段只係追返少少對前面全無威脅;反而12月越洋轉播贏馬升班嘅「太空穿梭」(Diastima)沿途放頭戰術放足大半程,末段仲可以彈甩對手輕勝成功升班,睇嚟春季天皇賞嘅入場劵可以拎定一張都得。
https://www.youtube.com/watch?v=i1kUXw4-RJA

至於星期六中山嘅1600米3勝條件賽,「紅瑪瑙」(Win Carnelian)睇嚟認清一哩先係佢出路,今場排到1檔就發達啦,跟住放頭馬大半程入到直路已經拋離群駒控制大局,事隔2場之後再贏馬升班,下場跑打吡公爵盃要對另一同場同程專家Smile Kana,可以話好戲在後頭。
https://www.youtube.com/watch?v=OwXWaa7osBg

新馬跟進就有馬后「飛雪仙蹤」(Snow Fairy)半妹、父系「大震撼」嘅Suresnes,佢喺星期日阪神1800米未勝利賽事出道,睇住岩田望來由起步慢閘留到落尾,入到直路比「華格納」全妹Miss Figaro步步壓住嚟跑差啲出唔到去,到最後100米先至撲上嚟趕過Miss Figaro,擺明憑隻馬質素食住你啦,騎果個都係有少少論盡。至於之後趕唔趕去三冠,則為後話。
https://www.youtube.com/watch?v=1xVbhAKWdG0

Photo: Netkeiba