【打破大震撼金身】日本名駒「真心呼喚」離世 享年22歲

Homan

10 March 2023 at 4:57:30 am

日本名駒「真心呼喚」（Heart's Cry）琴日喺社台Stallion Station無法站立而離世，享年22歲。

「真心呼喚」於2004年出道，並於同年取得日本打吡大賽亞軍，敗於名駒「夏威夷王」（King Kamehameha，キングカメハメハ）蹄下。其後下半年表現乏善足陳。轉歲後雖然於寶塚紀念賽及日本盃都跑入亞軍，但一直與一級賽頭馬無緣。

去到年尾，佢出戰有馬紀念賽，與應屆三冠馬王，與「夏威夷王」同主嘅「大震撼」（Deep Impact，ディープインパクト）對壘。結果「真心呼喚」今場喺李慕華策騎下，一改後上跑法，跟前角逐。結果轉入直路取得領先，並喺終點前力拒「大震撼」來犯，贏出其第一項一級賽冠軍。「大震撼」就吞下其唯一一場國內敗仗。

「真心呼喚」踏入2006年毅然挑戰海外賽，於杜拜司馬經典賽全程領放，以玩敵姿態勝出。及後轉到英國出戰英皇錦標，當時稱為英皇佐治六世錦標，入到直路一度以為有機會，不過最後200米轉弱，比當時如日方中嘅「風馳」（Hurricane Run）擊敗，只係得季軍。

「真心呼喚」結束其遠征之旅後，回國出戰日本盃再次面對「大震撼」，結果佢只以第10名完成賽事。「真心呼喚」其後退役，轉任種馬。

雖然「真心呼喚」配種成不如「大震撼」般突出，但都有唔少一級賽冠軍子嗣，如「一路通」（Just A Way，ジャスタウェイ）、「高尚駿逸」（Cheval Grand，シュヴァルグラン）、「文雅之士」（Suave Richard，スワーヴリチャード）及「雍容白荷」（Lys Gracieux，リスグラシュー）等。

「真心呼喚」於2020年從種馬引退，並以功勞馬身份喺社台Stallion Station頤養天年，直至琴日離世，享年22歲。



Source: nikkansports
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1