【打吡週末】英國打吡週末今晚展開

Homan

2 June 2023 at 7:44:07 am

葉森馬場今晚起一連兩日將會有三項一級賽上演，當中包括項經典賽事——英國橡樹大賽及英國打吡大賽。

喺兩項經典賽前，先會上演12化郎嘅年長馬一級賽——加冕盃。雖然只得5匹馬上陣，但實力相當接近。5匹參賽馬入面，只得今年兩戰兩勝嘅「海角遠景」（Point Lonsdale）未贏過一級賽，其餘4匹分別喺「颶風萊恩」（Hurricane Lane）、「唐尼」（Tunnes）、「韋氏」（Westover）及「上流貴婦」（Emily Upjohn）都曾贏得一級賽冠軍。

排位：https://www.racingpost.com/racecards/17/epsom/2023-06-02/835774

今晚先會上演英國橡樹大賽，英國一千堅尼頭三名都未有部署呢項一級賽。英國一千堅尼第四名Caernarfon係唯一一匹出戰英國橡樹大賽嘅英國一千堅尼參賽馬。最受注目嘅賽駒當然要數上場喺車士達橡樹大賽大勝22個馬位嘅古摩亞賽駒Savethelastdance，呢匹由莫雅策騎嘅賽駒為現時嘅大熱門。

另一匹受注目嘅賽駒就係上場喺Musidora Stakes突然大變身嘅Soul Sister，呢匹由高仕登及高素德訓練嘅賽駒直路上如入無人之境，大勝四個馬位而回，睇下可唔可以為戴圖理退休前整多場英國橡樹大賽冠軍喇。

第三勢力就數到莫艾誠策騎嘅Running Lion，呢匹「猛獅怒吼」（Roaring Lion）子嗣上場喺新市場表列賽Howden Pretty Polly Stakes大勝四個半馬位而回，睇下能否延續落去。而英國冠軍雌馬錦標冠軍「歡暢今宵」（Wonderful Tonight）嘅Heartache Tonight亦都會出戰呢項一級賽，睇下喺杜滿樂胯下表現如何喇！

排位：https://www.racingpost.com/racecards/17/epsom/2023-06-02/835773

星期六會上演英國打吡大賽，因為遷就足總盃決賽嘅關係，打吡會喺當地時間下晝1點半上演。參賽馬方面，來自英國二千堅尼嘅賽駒，有第五名嘅「昌榮千里」（Dubai Mile）。呢匹聖格盧準則大賽冠軍上場或許嫌短，今場再增程睇下可唔可以有進一步表現。不過「昌榮千里」並非現時嘅焦點，上場喺英國二千堅尼大敗而回嘅「多產巨匠」（Auguste Rodin）仍然係大熱門，之前岳伯仁誇下海口想以「多產巨匠」贏三冠，結果頭關就輸22個馬位。今次續用莫雅，仲話「多產巨匠」繼續會係佢地嘅重心，睇下表現如何喇！

其他引進賽方面，嶺飛打吡預賽錦標嘅頭兩名，英國打吡冠軍「雅大爺」（Adayar）嘅全弟「軍令」（Military Order）同董事盃冠軍「夏威夷」半弟「惠比壽」（Waipiro）都有部署英國打吡大賽。「雅大爺」果陣都係跑完嶺飛打吡預賽錦標得亞軍先再贏埋英國打吡大賽，因此全弟「軍令」極受當地注目。

重要預賽之一嘅東帝錦標，頭馬「勇孤隊」（The Foxes）繼續交由莫艾誠策騎。不過佢嘅注目度就不及上仗直路有阻塞而獲季軍嘅「過客」（Passenger），鞍上人金誠剛上場落敗直接承認自己喺陣上取位有失誤，佢相信呢匹「當代名著」（Ulysses）子嗣可以喺打吡有力一爭。

另一場指標賽事就係車士達銀瓶，由戴圖理策騎嘅「追捕」（Arrest）大勝六個半馬位。今場戴圖理繼續為此駒執韁，雖然戴圖理想喺最後一年策騎生涯中，盡量越贏越多，但車士達銀瓶頭馬去到英國打吡表現並唔算好，上一匹車士達銀瓶頭馬再贏英國打吡大賽，已經要數到2013年嘅「世界霸主」（Ruler of the World）。睇下戴圖理可唔可以破到數據喇！

排位：https://www.racingpost.com/racecards/17/epsom/2023-06-03/800632/

最後，有動物保護團體明言會到葉森馬場抗議，該團體早前喺全英障礙賽衝入跑道而令比賽延誤。今次嘅示威行動或許會對到時嘅賽事有影響，都可以密切留意事態發展。另外，當地鐵路工人表明會喺今週罷工，對前往葉森馬場觀賽嘅馬迷都有所影響，葉森馬場已臨時加設泊車位，以疏導入場人士。

Source: Racing Post
Photo: Racing Post
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Patreon：https://www.patreon.com/hkgoldracing
FacebookPage：https://www.facebook.com/HKGoldRacing
Twitch：https://www.twitch.tv/goldenrace
賽馬新聞：https://www.hkgoldracing.com/news-1