【打倒中央一戰成名】策Castle Top攻下日本泥地打吡大賽 騎師仲野光馬原與職業騎師無緣

Homan

16 July 2021, 10:39:31 am

星期三舉行既中央地方交流一級賽日本泥地打吡大賽,仲野光馬策騎既船橋代表馬Castle Top(キャッスルトップ)一放到底贏馬,爆出129.5倍巨型冷門。

Castle Top早段出閘後著意搶放,仲野中段稍為收慢讓座騎回氣,再於直路上用埋最後一段。結果,留放出色下終點仍有餘勢既Castle Top力壓三匹中央熱門馬God Selection(ゴッドセレクション)、Well Done(ウェルドーン)及Smasher(スマッシャー)贏得呢場日本一級賽。Castle Top係父系Bamboo Ere(バンブーエール)第一個日本一級賽冠軍。在港同父系馬有「錶之鈴」,唔知「錶之鈴」下季會唔會試下跑長啲呢?

講番騎師仲野光馬,現年31歲既佢,出道已8年,但於日本泥地打吡大賽前僅得44場頭馬,日本泥地打吡大賽為其第45場頭馬,就已經係一級賽冠軍。今年暫時只得5場頭馬,而Castle Top佔左當中3場。事實上Castle Top未交由仲野時只得一場頭馬,但仲野光馬夥拍Castle Top就未嚐一敗,人馬相當合拍。當然,練馬師及馬主於大賽下未有換走仲野,都相當有膽識。或者佢地覺得今場唔會有機會贏到,練馬師甚至原本為Castle Top報左星期六既船橋賽事。

有朋友或者發現仲野光馬24歲先出道,皆因其出道經過都幾兜轉。佢曾為地方競馬88期見習學員,但礙於其身高及造磅問題未能畢業。及後佢曾轉到其他行業工作,不過因緣際會下回到馬圈做馬房助理。而佢以24歲馬房助理身份再投考地方騎師牌照,結果順利合格出道。一直支持及頭馬數不多,而勝率維持於3-4%。不過今年似乎有改變,勝率暫時7%,希望呢個一級賽頭馬可以為佢帶來更多支持。

Source: Netkeiba
Photo: @Aki_piko (Twitter)

賽事重播:http://keiba-lv-st.jp/movie/player?date=20210714&race=11&track=ooi