【我地孖生架】JRA孖生兄弟騎師 細佬柴田未崎跑畢今週引退

Homan

23 June 2022, 4:53:44 am

JRA第一對孖生兄弟騎師——柴田大知及柴田未崎喺1996年出道。與福永祐一及和田龍二等一同出道,被譽為「花の12期生」,至今已從騎多年。

柴田兄弟策騎生涯成就並不高。若從成績比較,哥哥大知會較好。柴田未崎只有服役頭四年有雙位數字頭馬,但都不過20場。頭馬數字及支持持續低迷,未崎曾於2011年一度引退,並轉任騎馬人。而哥哥柴田大知遇到相似情況,2006及2007年更試過無頭馬進帳。哥哥柴田大知嘅遭遇令2011年引退嘅柴田未崎再次復出策騎。

柴田大知當時遇到貴人——「總帥」岡田繁幸,「總帥」2011年起將好多旗下馬都交比柴田大知,助佢建立自信。當時渴望出賽嘅大知已經同時出戰平地及跳欄賽。而「總帥」對佢嘅信任,令佢可以策騎Meiner Neos(マイネルネオス)贏得跳欄一級賽中山Grand Jump。及後柴田大知一直為マイネル系賽駒不斷建功,頭馬數字亦由2011年起保持住喺雙位數字頭馬。當中更喺2013年策Meiner Ho O(マイネルホウオウ)攻下NHK一哩賽。

哥哥嘅遭遇,令未崎再次跨上馬背,再次投考騎師並於2014年以騎師身份出賽。可惜復出後表現都未見有好大起息,柴田未崎決定跑埋今個星期嘅JRA賽事就會退役。佢預計自己會喺星期日阪神第12場賽事絲帶賞策騎「白山紫丁」(Hakusan Lilac,ハクサンライラック)後就會退役。到時香港會有轉播,睇下會唔會由佢帶來「有終之美」,但佢上半年只上陣9次,未曾入位。

Source: sponichi
Photo: UMAJO