【愛情之戰終於贏返場】

Tony

今個星期日本喺福島、阪神同函館都有賽事,不過邊度跑都好,放頭都係最著數。

今次報導嘅全部都係星期日賽事,一共有兩場級際賽同一場條件賽,全部都係放頭先贏。首先係今年轉去阪神跑嘅CBC賞,「愛情之戰」(Love Kampf)喺短途馬錦標得亞軍之後就連場大敗,諗住隻馬輸到冇晒鬥心;點知到今場配齋藤新輕磅上陣,佢一起步就搏命推上前,入到直路就拋離對手,後面啲馬完全埋唔到身,終於贏返場三級賽。話就話幾經辛苦贏返一場,但係水準就認真麻麻,贏緊嘅不過係公開賽得主Aonbharr、上年盟主Red en Ciel同「大成前程」(Taisei Avenir)之流,「超神建築」係影都冇。「愛情之戰」下場換藤田菜七子跑新潟短途錦標,睇下到時可唔可以喺夏季系列賽搶分啦。

另一場福島嘅三級賽日經電台賞,團野大成喺第7場墮馬受傷,原本佢騎嘅Babbitt就換咗內田博幸上陣,而做替工嘅內田亦都跟足贏馬方法即係放頭,轉彎果陣再加速彈甩對手。福島條直路咁短對手想埋身都冇計,結果贏5個馬位造出三連勝。Babbitt血統出自「中山慶典」,氣量應該唔錯,之後應該會部署中長途賽事。

10月舉行嘅菊花賞會有唔少夏季跑條件賽上位嘅馬出戰,今個星期就檢閱潛在出賽馬。阪神有2勝條件賽兵庫特別,大部份人都關心細細粒馬女「山茶花」跑完春季天皇賞返嚟條件賽到底贏得未,結果都係贏唔到只得季軍;主角就落喺上年轉播賽見過嘅「一聲雷」(Roll Of Thunder)身上,失意於青葉賞冇得跑打吡嘅佢返到條件賽再出發,今場福永祐一將隻馬段段24秒咁放,直路上如入無人之境,大勝9個馬位返嚟。「一聲雷」下場出戰神戶新聞盃,點都要換人上陣,就留意可唔可以用同一招收死「鐵鳥翱天」。

Photo: Netkeiba
重播:
https://www.youtube.com/watch?v=1dOlqPI9Gfw
https://www.youtube.com/watch?v=OjZWMVNUg94
https://www.youtube.com/watch?v=7jmXwHkzBzQ