【必利時錦標前瞻】冇三冠馬嘅一年

Ramos

21 May 2022 at 12:29:01 am

嚟緊呢個星期日凌晨 (美國時間週六)，將會上演美國三冠次關必利時錦標，過往呢場三冠次關都較少馬匹出戰，而且上仗於肯塔基打吡爆大冷的Rich Strike，賽前已宣布唔跑呢場，亦意味著今年將不會誕生三冠馬王。

今場賽事只得九匹賽駒角逐這場1900米的一級賽，其中吸引了肯塔基橡樹大賽盟主Secret Oath參戰，上場雖排一檔起步，但於對面直路已在外疊望空，確保有足夠空間食住Momentum順勢而上，結果直路進一步帶離對手勇奪錦標，今場選擇挑戰雄馬，續配施奕誠出戰，希望繼 Rachel Alexandra 及 Swiss Skydiver後，再有雌馬勝出此賽。

雖然冇咗肯塔基打吡盟主在陣，但其中一些蹄下敗將將再次在此相遇，亞軍 Epicenter 及殿軍 Simplification。上仗最後階段，前駒冷不提防 Rich Strike 從內欄竄上而飲恨，今場繼續由羅沙里奧執韁，勢要獲得正名；後駒今場則換上華拉素奇出戰，而上仗策騎此駒的奧天誠，將會夥拍 Wood Memorial S. 亞軍 Early Voting出賽，剛戰段段快放至終點前被Mo Donegal 趕過，及後避戰打吡而等待此場以逸待勞，加上其血統，此程理應更合發揮。

另一邊廂，有一匹潛力不俗的賽駒亦加入戰團，Creative Minister今年三月才出賽，三戰獲兩冠一亞，但上仗於打吡日的1700米賽事，所造出的Rating頗高，有108分，如果今場主要對手稍有差池，有力成為奇兵一路。

Source: Equibase
Photo: Roadtrips