【得來不易】矢作芳人跨越多個障礙 寫下日本賽馬史上新一頁

Homan

9 November 2021 at 6:24:47 am

日本練馬師矢作芳人於上星期日嘅美國育馬者盃賽日，憑「唯獨愛你」（Loves Only You，ラヴズオンリーユー）贏出育馬者盃雌馬草地大賽及Marche Lorraine（マルシュロレーヌ）贏出Breeders' Cup Distaff。不但為日本代表首次贏出美國育馬者盃賽事，更係首次有日本代表於美國贏出泥地一級賽。

原來矢作芳人成為練馬師已經跨越多個離關。佢少時曾受到父親反對向賽馬方面發展。矢作芳人為地方大井練馬師矢作和人之子，細個已經接觸賽馬，並於高中畢業後立志向賽馬方面發展。但父親矢作和人極力反對，後來兩人商討數月後，父親終允許矢作芳人投身賽馬行業，但必需向JRA發展並需要到外地學習更多賽馬知識。

之後矢作芳人到訪澳洲學習不同嘅賽馬知識，除左悉尼外，佢亦曾到維省學法。佢從中學習到如何於賽駒密跑下保持狀態，令佢嘅賽駒可以於短時間內連續上陣。佢回到日本投考JRA競馬學校嘅馬房人員課程，但考左兩次都唔合格，終於1984年7月投考成功入學。佢於1984年10月開始馬房助理生涯，之後都算幾順利，可惜佢捲入一暴力事件而令佢人生一度停滯不前。

佢於1991年捲入一件與當地黑幫嘅暴力事件，比JRA列入黑名單，並指矢作芳人唔會可以成為JRA嘅練馬師。結果，矢作芳人不斷努力嘗試，未曾放棄參加練馬師考試。結果，可能佢嘅努力感動到JRA，或者JRA覺得佢已經有足夠反省。佢於2004年成功考到練馬師牌照，期間合共考左14次。如果，JRA一直列矢作芳人為黑名單，可能今日就唔會有矢作芳人為日本競馬界創追歷史。

2005年開倉後，矢作芳人表現一直唔錯，更於2012年憑Deep Brillante（ディ7プブリランテ）贏得日本打吡大賽。及後更於2014年首度贏得日本冠軍練馬師，亦以「不撓真鋼」（Real Steel，リアルスティール）贏出2016年杜拜草地大賽。

不過於呢一年，命運再次捉弄呢位練馬師。佢於2016年被驗出患有第二期前列腺癌。好彩發現得早，而且矢作芳人高中同學好多都係醫生，令佢可以得到適切嘅手術治療。佢憶述當時相當痛苦，麻醉過後痛楚難以形容。佢足足休養近一年先可以過正常生活。

正當以後矢作芳人康復後需要好多時間先可以踏回正軌，但佢猶如「不死鳥」回歸，於2018年就憑「魔族雅谷」（Mozu Ascot，モズアスコット）贏得安田紀念賽。可惜，佢於2019年再次驗出復發，今次由於發現得更早，今次只需化療。佢合共接受33次化療，但要捱過化療亦相當不容易，更莫講話要繼續馬房運作。但矢作芳人相當利害，於2019年憑「雍容白荷」（Lys Gracieux，リスグラシュー）贏得寶塚紀念賽、覺士盾及有馬紀念賽。「雍容白荷」除左為首匹贏得覺士盾嘅日本代表外，更為早年留學澳洲嘅矢作芳人贏得首個澳洲一級賽冠軍，可謂帶來多重意義。

2020年佢不但再次登上冠軍練馬師寶座，更訓練出首匹三冠馬「鐵鳥翱天」（Contrail，コントレイル），為馬房首匹三冠賽駒。今年更於美國育馬者盃兩勝一級賽，為日本寫下賽馬史上新一頁。若然當初矢作芳人中途放棄，未能成為練馬師，可能日本代表要贏得美國育馬者盃要再等等。


Source: 開成調教師 安馬を激走に導く厩舎マネジメント, netkeiba
Photo: Breeders Cup