top of page

【年度成績表】國際馬聯公布2021年馬匹評分及百大一級賽
Homan
25 January 2022 at 5:14:49 pm
國際馬聯喺香港時間琴晚十點舉行網上直播,公布過去一年嘅馬匹評分及百大一級賽。
馬匹方面,美國育馬者盃經典大賽冠軍Knicks Go以129分贏得2021年最佳表現馬匹,雖然佢喺一哩距離表現只得125分,但憑住美國育馬者盃經典大賽一戰,喺中距離賽事被評獲129分,壓倒三匹歐洲馬,登上2021年之巔。亦都係自2017年「霸道駒」(Arrogate)後,再有美國服役賽駒登上國際馬聯最佳馬匹寶座。
三匹歐洲賽駒則並列第二,佢地同得127分。三匹賽駒分別係英皇錦標冠軍「雅大爺」(Adayar)、朱德望國際錦標冠軍「萬勝飛」(Mishriff)及日蝕大賽冠軍「金教堂」(St Mark’s Basilica)。當然佢地年內唔只贏得一場一級賽,但以上賽事係令到佢地可以以127分平分世界第二。
日本賽駒「鐵鳥翱天」(Contrail)雖然年內只有一場一級賽日本盃,但該仗被評為126分,獨佔第五名。另外合共有四駒平分第六名。佢地同得125分,分別係女皇伊利沙伯二世錦標冠軍「勝千里」(Baaeed)、樂景傑錦標冠軍「海上宮殿」(Palace Pier)、凱旋門大賽冠軍「驚世詩才」(Torquator Tasso)及香港一哩錦標冠軍「金鎗六十」。而「金鎗六十」亦都係香港最高分嘅賽駒。
而第十名嘅分界時係124分,分別有日本嘅「樂透心」(Efforia)、美國嘅Flightline、Life Is Good及Medina Spirit及澳洲嘅短途王「綠化帶」(Nature Strip)。「綠化帶」亦都係全球最高評分嘅短途賽駒。
賽駒排名可參閱:https://www.ifhaonline.org/resources/WTRRankings/LWBRR.asp?batch=86
百大一級賽方面,百大一級賽分數由該仗頭四名賽駒所造評分既平均數得出。而上年失落最高評分一級賽嘅凱旋門大賽,今年多匹高分馬前往參戰且跑出水準,雖然結果出人意表,但佢仍然以平均124.75分重奪百大一級賽嘅第一名,亦反映上年該項賽事嘅水準係相當高。
而第二名喺僅差0.25分嘅美國育馬者盃經典大賽,佢以124.50得第二,畢竟有Knicks Go造出129分幫手拉高,得第二亦相當合理。第三名喺英皇錦標,雖然只得五匹馬角逐,但平均分達123.50分。日本秋季天皇賞就以123.00分位列第四,今年該項賽事有「樂透心」、「鐵鳥翱天」及「放聲歡呼」出戰,三匹亦跑出水準帶高評分。而第五名係122.50嘅肯塔基打吡,係今年最高分限齡馬賽事。
香港方面,最高分係平均達120分嘅女皇盃,不過2021年頭四名皆為日本代表。而以119.50分緊隨女皇盃,為香港第二高分賽事有兩場,分別係香港一哩錦標及上年初嘅董事盃,兩場皆由「金鎗六十」奪冠。反而2020嘅香港最高評分賽事香港盃就跌至香港第五高評分賽事。
12個國家或地區佔據整個百大一級賽排行榜,當中澳洲最多,佔四分之一,有25場。其次順序就有:
美國(19場)
英國(17場)
日本(11場)
香港(8場)
法國(5場)
德國(4場)
南非(4場)
愛爾蘭(3場)
阿聯酋(2場)
紐西蘭(1場)
烏拉圭(1場)
賽事排名可參閱:https://www.ifhaonline.org/resources/WTGradedRanking/LWGRank.asp?batch=5
Source: ifhaonline.org
Photo: @worldsbesthorse
bottom of page