【幫香港一哩錦標驗水準】「神志勇進」讀賣一哩盃復出即勝

星期六福島舉行年長馬女限定三級賽1800米福島牝馬錦標，要講戰況之前都忍唔住要講一句，點解呢期JRA咁多事故？退出馬又多，騎師落樓又多，跑呢場賽事之前都有4單落樓事件 (3單福島、1單京都)，嚟到呢場重頭戲，跑到半路，「曲動心神」(Shinryokuka，木幡初也) 碰及對手首先落樓，Light Quantum (吉田隼人) 走避不及跌埋一份，木幡初也手腕受傷，吉田隼人頭部受傷；前面幾匹對手就未受影響，Feel Sympathy (橫山琉人) 最後200米先封一封Costa Bonita (岩田望來)，再追過放足大半程嘅「羅盤致勝」(Win Pyxis，松岡正海)，橫山琉人仲諗住級際賽開糊，偏偏岩田望來未肯投降，比人封完位再兜返出去追過，本來落後2個馬位，一來一回，門前成功反先一個頸位，粉碎對家好夢！

星期日京都雨中上演二級賽1600米讀賣一哩盃，睇「金鎗六十」最後一戰之前，先嚟一個頭盤，順便檢閱「浪漫勇士」嚟緊要對啲乜嘢對手。全場最高級數兩匹「神志勇進」、「秀逸小島」嚟香港對「金鎗六十」、「遨遊氣泡」比上不足，回師京都對住班「二打六」就比下有餘，特別係「神志勇進」，搵團野大成做替工頂替前一日落樓嘅松山弘平影響唔大，全程走住大圈，直路輕鬆追過Nihonpiro Kyiv (田口買太)，以1 3/4馬位取勝，表現出色；「秀逸小島」排3檔仲要落住雨跑點都蝕底，川田將雅都已盡所能，沿途走住不利地，門前幾步先過到Nihonpiro Kyiv，叫做交回應有水準，反而Nihonpiro Kyiv對住兩強所負不遠，表現有驚喜，留待夏季系列相當有用。

同日東京舉行3歲馬女限定二級賽2000米花仙錦標，決定2張橡樹大賽入場劵，Admire系/近藤旬子自接手先夫近藤利一嘅賽馬事業一段時間，不過大幅減少投資，自「頌讚火星」之後亦好少見呢件衫跑大賽；今年難得出到一匹亮相經典戰線份子，睇吓呢匹Admire Belle (橫山武史)，先前跑開東京同程1勝賽對住雄馬都有接近表現，今次對返馬女點都要秤先，由早段跟住馬群大約中間位置，轉入直路中段，逐步交出追勢，最後100米控制大局，為POG有份揀佢參戰嘅Patrick賺5200分；另一張入場劵就由Lavanda (岩田望來) 拎走，不過過程都幾驚險，沿途喺大約第4位，直路早段比3匹對手「品」字型咁排冇位出，去到最後300米先沿內欄窄位推進，追回一席亞軍。

知舍POG除咗Admire Belle之外，仲有2匹馬交出勝仗。首先係星期六東京馬女限定未勝利泥地1600米，Fuino Majiwari (田邊裕信) 今年轉跑東京泥地一哩兩場都走入揭示版，叫做搵到出路，跟手小休一輪等東京賽期同樣條件復出，對住大半組未上過名嘅對手，邊有得輸？田邊發揮亦恰如其分，排15檔起步，沿途走大圈唔使食沙，入到直路睇住對手嚟食，終點前擴大優勢贏2個半馬位，幫首映賺550分。

https://jra.webcdn.stream.ne.jp/web/jra/onetag2020/eqPcPlayer2.html?target=202402050101

星期日京都另一組未勝利跑泥地1900米， 出自「黃金巨匠」、母系曾經喺美國泥地G1上名嘅Derma Atman (荻野琢真) 上年一嚟就搵場草地初出，輸條街返嚟唔算意外，再轉去札幌跑泥地，結果又輸一條街，幕後都未使等到成個2歲賽季完，就決定拎去做閹割手術，以圖改善表現，果然閹完到年尾跑返一場表現有進步；今次直頭脫胎換骨，由以前完全跟唔到大隊，變成有前速放到頭，直路越走越順，大勝5個馬位，幫南總賺550分。

https://jra.webcdn.stream.ne.jp/web/jra/onetag2020/eqPcPlayer2.html?target=202403080203

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1