【希威森日本之旅完美結束】

Tony

希威森日本客串期最後一週都有二級賽贏!

除咗春季天皇賞,今個星期仲有東京2場3歲賽事,派出Classic入場劵。

星期六上演青葉賞,彌生賞季軍Authority放棄皐月賞轉過嚟呢組,級數上略勝一籌,希威森起步之後將隻馬守住條欄,入直路到等外邊有空位就抽出去衝,唔等入邊塞車盡顯智慧,贏出呢場二級賽都算實至名歸。同佢一齊拎走打吡入場劵嘅係Valcos,不過大家可以睇下三浦皇成點樣可以將一場可以贏嘅賽事輸咗。7檔起步留後冇錯,但係就驚死塞車咁喺對面直路起開始望空,諗住可以先發制人,到最尾衝起上嚟就唔夠慳咗好多位嘅Authority衝!如果唔係Figlio Allegro最後幾步停咗,可能連第2都保唔住。至於希威森亦喺星期日尾場贏出,為今次客串劃上完美句號。佢喺客串期內贏出19場頭馬。佢話嚟緊會留喺日本多一個星期,之後會坐政府包機返南非,希望下年再去日本客串。

星期日就有碗豆錦標,Des Ailes入到直路一望空就自動上前,彈甩其他對手,拎走最後一張入場劵。望埋最後600m時間造緊32秒半,以呢場表現計可能係社台系秘密武器,唔聲唔聲嚇你一驚。呢隻馬阿媽係2014年法國一千堅尼及法國橡樹盟主「前途在握」(Avenir Certain),之後跑過凱旋門大賽所負不遠。以血統計2400m應該可以應付到,不過要贏就要問過岡田家果幾隻先。

Photo: Netkeiba

重溫:
https://www.youtube.com/watch?v=liulAaP0Wr0
https://www.youtube.com/watch?v=bQfStH_IZi8