【巴利多爾最佳】「金教堂」腳部疼痛持續 退役轉任種馬

Homan

28 September 2021 at 12:18:55 am

「金教堂」（St Mark's Basilica）三歲出戰未逢敵手，季內四勝一級賽。上仗愛爾蘭冠軍錦標後，一直未有恢復正常操練。幕後於上週末商議後決定將呢匹多項一級賽冠軍退役，並轉任種馬。

「金教堂」出自法國種馬「先勇名駒」（Siyouni），於兩歲贏出杜荷斯特錦標。及後轉歲後先專注於法國攻堅，為古摩亞帶來法國二千堅尼及法國打吡冠軍。七月初回到英國於日蝕大賽對年長馬輕勝而回。雖曾於朱德望國際錦標因傷避戰，但九月於愛爾蘭冠軍錦標復出，仍壓倒「大利威」（Tarnawa）贏馬。或許馬迷最想睇到另一匹三歲好手「雅大爺」（Adayar）與「金教堂」一戰，不過似乎無法實現。

岳伯仁於訪問提到「金教堂」相信係巴利多爾有史以來最佳賽駒，亦都係相當重要嘅賽駒。佢認為佢會係「天文學家」（Galileo）以來古摩亞牧場最重要嘅種馬。「金教堂」上線來自「先勇名駒」，而外祖父為「天文學家」。岳伯仁就話「金教堂」不但遺傳到「先勇名駒」嘅速度，亦有「天文學家」嘅鬥心。而血統而言，「金教堂」可以與緣自「天文學家」嘅雌馬配種，以達致雙重血緣（inbreeding）。

古摩亞傾向將「金教堂」退役，相信與「天文學家」早前離世不無關係，即使古摩亞種馬成群，但「天文學家」地位一直無可代替。「金教堂」服役成績出眾，且血統可與「天文學家」雌馬相配。古摩亞相信「金教堂」可取代「天文學家」亦不無道理。祝願這匹「巴利多爾最佳」退休生活美滿。