【川河系從源頭著手 大手購入週歲馬】

Homan

川河系主理人何家駒先生近日除左想買The Everest 既Slot之外,仲搵左同佢合作開既練馬師薛拿(John Sadler)高價買入好多匹週歲馬,似乎想繼續大展拳腳,同時又搵下睇下有冇馬適合運港作賽。

維省練馬師薛拿係近日既神奇百萬拍賣會使左近四百萬澳元(約二千萬港元)購入十匹週歲馬。佢就話今次能夠用咁多錢買馬,係何生搵幫佢幫手買週歲馬。呢十匹週歲馬包括有出自「龍王」(Lord Kanaloa)及「勢力硬」(Shalaa)既雄馬及一匹出自Not A Single Doubt既雌馬,三匹馬既成交價都係五十萬澳元或以上。而呢啲週歲馬預計會係澳洲跑下先,之後以PP籤身份黎香港。而薛拿曾經係現時香港服役馬「川河明駒」既原練馬師,睇黎之後都會繼續見到大多川河系既馬由薛拿訓練。不過黎緊既「川河達駒」就唔係薛拿訓練,而係由悉尼練馬師布烈治訓練。

事實上,都有一啲馬主會有一啲外地御用練馬師,如「加州」系既澳洲來港PP,若原先由其擁有的話,大多都會由施諾敦及施保賢(Peter & Paul Snowden)先訓練,令佢有一定水準先運黎香港。今次「川河」系於源頭投資,目的都係想確保黎香港既馬不但已有一定成績,而且可以揀一啲適合香港既馬,無謂浪費支籤。

Source: tdnausnz.com.au