【小倉路程紀錄破完再破 初勁越級挑戰贏CBC賞】

Tony

6 July 2021 at 2:06:57 pm

今個星期日本有兩場三級賽。

星期日小倉先舉行CBC賞，上年喺轉播賽日見過嘅「初勁」(First Force)，抖咗大半年仲要以3勝條件馬身份越級挑戰三級賽，睇內容以為佢輸咗九成？未必，今場一出閘好似火箭咁衝上前面，頭600米放緊32秒3都仲唔斷結果一放到底，後面「妙發靈機」(Pixie Knight)追極都追唔到。再望一望時間，1分6秒正，破咗前一日2勝條件個紀錄時間，快成4線咁多！幕後打算下場出戰北九州紀念，睇下佢可唔可以喺系列賽繼續搶分。至於九州產馬Yoka Yoka，今場返嚟家鄉跑捧成大熱唔出奇，沿途跟住「初勁」跑都冇錯，但係隻馬一路打鞭一路閃仲要阻到隻「大成遠見」(Taisei Vision)抽起，最後幾步腳都軟埋得第5，揹住呢個磅嚟講表現都幾失望，技止於此。
https://www.youtube.com/watch?v=kTdXniq-yC8

福島呢邊就有3歲唯一讓磅三級賽日經電台賞，木村哲也今場派兩隻馬跑結果一個天一個地，大熱「御地之驥」(Boden)換咗個武藤雅上去即刻出事，一出閘唔夠快就留後兼夾轉彎飛到出啤酒園握手都知敗象早呈；反而上場跑主角錦標第4嘅Weiss Meteor，丸山元氣今場留到隻馬夠舒服，去到轉彎準備移出去一打開到門就自己衝上嚟控制大局，彃甩後面「世界振興」(World Revival)同North Bridge，同你睇緊谷草食糊位一樣體驗！
https://www.youtube.com/watch?v=SRQQQbfrTrE

小倉星期六亦都有個新場地紀錄產生，星期六3歲未勝利跑1800米，「戰舞者」(Salios)細佬Escola落嚟跑呢場，啲對手邊夠佢跑呀？去到對面直路踩油放頭，轉彎已經放甩成3個馬位後面真係食晒塵，大家有見川田將雅騎過咩？結果贏緊大差返嚟，仲要跑1分43秒8，快舊紀錄3線。Tony唔係見呢場贏得咁誇張兼夾破晒紀錄都唔會攝版面拎嚟講，事實上嚟到暑假未勝利賽多數水準都唔高，仲要呢隻係吉田家拎嚟自肥都唔拎去絲綢會一口，叻極都有限！
https://www.youtube.com/watch?v=kRJcjiRbisg

跟住就講下知舍POG遺珠系列，星期日函館新馬賽，身價2400萬、籌集3400萬(8.5萬x400口)嘅獅子會一口馬Al Naseem，血統來頭不小，舅父係「艾恩遺跡」同「大帝」(Shahryar)兩匹G1馬，一出就幾受注目，落到場跑守住尾四跟住馬群尾，再慢慢移出去自動波上前，入到直路已經過晒所有對手，終點前見武豊都收晒韁，贏緊2個馬位。睇佢呢度有差唔多1000米衝力，唔講仲以為呢隻係「威爾頓」嚟。
https://www.youtube.com/watch?v=bRrn7_yWlvo