【守諾言久休復出贏鳴尾紀念】

Tony

今個星期除咗安田紀念之外,仲會講鳴尾紀念同2歲新馬賽。

今次集中報導星期六嘅賽事,首先係三級賽鳴尾紀念,跑完維多利亞一哩賽之後嘅「唯獨愛你」最終決定跑今場有冇得輸?係有得輸嘅!佢跑今場就係因為負重54公斤夠晒輕,但跑起上嚟略嫌均速,入到直路追住前面對手都非常吃力,狀態似乎都係得七八成到;反而抖咗13個月復出嘅「守諾言」(Perform A Promise)一入直路見有位就抽出嚟,差唔多步步head住「唯獨愛你」,結果兩駒一齊衝線,「守諾言」影相影贏咗,「怡樂赤駿」(Red Genial)後上跑第3。呢組其實水準都好差下,跑完今場之後退役配種嘅「古埃及王」(Saimon Ramesses)都拎返個第4,雖然有人棄我取之嫌,但大家可以諗下後面啲馬表現有幾差?

東京星期六就有公開賽八腳馬錦標,就算轉咗負磅條件都好,都係開返上個月燦爛錦標嘅三重彩,名次都冇轉過。Ailes du Courage就算今場要揹多3公斤都好,只要夠快走上前面就頂到返終點,2100米又贏一場。Master Fencer換咗濱中俊上陣,但係10隻馬場合都要守住5至6位,似乎後咗少少,入到直路點騎都過唔到頭,呢個第2都算唔差。Satono Titan因為贏過三級賽所以罰磅罰到負59公斤跑呢場,一路都埋唔到身仲要比對手彈甩,最終追返一席第3。上次已經講過JRA中距離泥地公開賽少得可憐,如果唔跑夏季地方果兩場賽事,就要等到10月東京同場同程先岩跑,唔知之後Ailes du Courage同Master Fencer點部署呢?

踏入6月就係JRA嘅2歲新馬開始上陣嘅時間,名氣最響、出自「滿樂時」同「迷人景致」組合嘅Buena Ventura,初出用到連達文都冇乜點跑錯,但結果都係要輸比Win Aglaia;後駒騎師橫山武史直路發力嘅時機同埋啲推騎都一絕咁靚,抵你贏呀!

Photo: Netkeiba
重溫:
https://www.youtube.com/watch?v=D5RZz3UWmB0
https://www.youtube.com/watch?v=n6aXPIuNn4c
https://www.youtube.com/watch?v=pllY9Rb0SZA