【好心做壞事?】英國馬會就賽事最低負磅修例 騎師反應負面

Homan

26 January 2022, 2:05:05 pm

英國馬會喺疫情期間因桑拿需關閉而暫時提高賽事最低造磅3磅,由112磅(8 stones)提高至115磅(8 stones 3lbs)。

不過英國馬會琴日公布,有關措施已由另一措施永久取代。佢地決定無論平地定跳欄賽事,賽事最低造磅會永久提高2磅,即由原來平地嘅112磅(8 stones)提升至114磅(8 stones 2lbs)及跳欄嘅140磅(10 stones)提升至142磅(10 stones 2lbs)。兩項措施將分期執行,平地會喺3月26號開始,而跳欄賽事則喺4月29號開始。而喺新措施未實施前,當地賽事最低造磅仍然會沿用疫情下嘅措施。

因疫情而關閉嘅馬場桑拿房,新措施實施後將永久關閉,意味著騎師需要喺無桑拿房嘅情況下造多一磅。英國馬會嘅首席醫療顧問Dr Jerry Hill就話關閉桑拿房及提高賽事最低造磅,對騎師嘅身心都有正面作用,同時亦保護緊隨之調高嘅賽事最高負磅參賽馬嘅競爭性。佢地認為騎師喺出賽前嘅最後一刻先焗汗造磅,並唔係最佳做法。因而決定關閉馬場桑拿房。

騎師對於英國馬會修例取態頗為負面,女騎師Megan Nicholls喺Racing Post嘅訪問指馬場桑拿房原本係屬於騎師喺馬場嘅福利之一,當局剝奪騎師福利並不合理。而且騎師經過疫情期間,身體比以往強壯(因疫情期間措施),雖然當局話提高賽事最高造磅,但事實上並非如此。雖然騎師協會有派代表出席會議,但似乎未能完全反映騎師嘅要求,Megan指當局未就有關措施詢問所有騎師嘅意見,亦無事先做調查。佢認為當局應就有關措施與騎師們作更深入嘅討論。

另一位與Megan Nicholls持相似觀點嘅仲有金誠剛,佢直指大家總括黎講並不開心。佢覺得英國馬會一方面給予優惠,另一方面卻攞走佢地原本擁有嘅野。大家因為一直被蒙在鼓裡而有啲沮喪及生氣。佢地希望英國馬會可以重啟討論。

越黎越多騎師就有關決定表態,大多反應負面,包括馬昆等騎師。睇下稍後英國馬會會唔會就有關措施再與騎師們商討喇!

Source: Racing Post
Photo: Racing Post