【女皇盃I’m coming】「先見」金鯱賞大勝壯行色

星期六中山舉行馬女限定1800米三級賽中山牝馬錦標，上年經典賽失意軍全面進場，睇吓前田家名下Conch Shell (岩田望來)，年初贏完一場3勝條件賽上嚟對住一班跑馬女限定賽嘅中堅份子，一出閘貼到欄領放，岩田仔控到步速一絕咁靚，頭1000米開緊61秒5，去到後半程先踩快，臨尾再開兩段23.2、24.3，成功一放到底；「艷日麗」(Kukuna，戶崎圭太) 就早早留後，去到對面直路尾逐步上前，再追足一條直路，仍以半個馬位見負，差少少先光榮退役。

星期日中京舉行2000米二級賽金鯱賞，與其睇同日某啲地方嘅一級賽跑平磅可以成群一齊過終點，水準成疑，不如研究呢場仲好過，全場焦點落喺上年菊花賞得主「堅韌力」(Durezza) 身上，網上評論話上年三冠雄馬水準得佢未驗過貨，先唔講佢跑成點，淨係一場熱身賽，最尾2倍都冇開閘，平日唔睇賠率嘅Tony都要講一句「I beg your pardon」？「浪漫勇士」跑覺士盾之前拎場東寶錦標熱身，最後得返16蚊開跑，起碼叫做用佢最擅長嘅路程熱身，都叫講得通，但而家講緊用場唔啱路程做熱身呀！擺李慕華上去19蚊開跑，同智商稅有咩分別？結果沿途跟住馬群中間，直路拎出去外欄，臨門幾步先撻著衝一衝收返個第2，表現只屬「交行貨」級數，唯有等春季天皇賞見真章；反而跑完香港盃復出、今場打衛冕戰嘅「先見」(川田將雅) 表現出色，入直路一攝入內欄空位，一鞭未打，贏到離行離列，大勝5個馬位，賽後亦一如所料下場來港出戰女皇盃，到時交返呢個表現，「浪漫勇士」想三連霸？你就想呀！

==============================

Telegram公海：https://t.me/GoldRacing

YoutubeChannel：https://www.youtube.com/c/GoldracingHK競馬知舍

Instagram：https://www.instagram.com/gold.racing/

Patreon：https://www.patreon.com/hkgoldracing

FacebookPage：https://www.facebook.com/HKGoldRacing

Twitch：https://www.twitch.tv/goldenrace

賽馬新聞：https://www.hkgoldracing.com/news-1