鹿

11 June 2022 at 3:04:57 pm

​

今屆只得 8 匹馬角逐，焦點當然落喺爆巨冷贏肯塔基打吡嘅 #4 Rich Strike 身上，從標售馬搖身一變成為打吡盟主，一戰成名，背後故事固然引人入勝，但從分析角度入手就相當頭痛，跑完打吡後筆者刻意重新研究賽績與及賽事片，重新做一次份功課，都的確無辦法得到任何明顯跡象去解釋贏馬因由，只能勉強得出兩個結論：邱吉爾園特佳、受惠極端快步速，但呢兩個元素都唔會喺今場賽事再出現，冇成為大熱門亦某程度反映當地對 Rich Strike 嘅疑慮，幕後一早避戰必利時的確未必無因。

大熱門落喺 #1 We The People 身上，上仗出戰小飛俠錦標大勝而回，跑濕地造出近五屆同項錦標最快時間，近屆此賽都曾經跑出過 Sir Winston 成為貝蒙冠軍，但最重要係今仗欠缺放頭馬，We The People 好大機會主宰步速，只要氣量扳到勝望應該極高，成為大熱亦算合情合理。

#6 Mo Donegal、#8 Barber Road 都係肯塔基打吡留後大外一氣而跑近，避戰次關必利時而直接增程哩半都屬正常部署，今仗關鍵在於陣上發力點，要交由騎師發揮，論馬未見得差過 Rich Strike 太多。

橡樹亞軍 #3 Nest 以雌馬身份挑戰，橡樹一役後追不敵 Secret Oath，從後者再出挑戰必利是錦標表現計，似乎今年雄馬同雌馬組別之間水準上有少少距離，純粹放喺今組而言，有少少未見底牌嘅角色。

#5 Creative Minister 從必利時戰線部署，上仗其實都跑到無可挑剔，跟住頭馬發力，騎落如果話流於均速，倒不如話實力見盡，今仗唯一優勢係可以前置。