【大賽前瞻】2022 肯塔基打吡

鹿

7 May 2022 at 10:11:40 am

回顧過去三年肯塔基打吡，可謂年年出意外、年年有故講，大前年 Maximum Security 阻人被 DQ，前屆就因武肺推遲至九月舉行，去到上屆就有 Medina Spirit 因禁藥被 DQ，其練馬師巴富達亦因此被禁賽，事件餘波亦延續到今年，所以今年賽事就倒不如由巴富達講起。

由於巴富達唔能夠派馬參賽，旗下幾匹爭標希望早於個幾月前轉投到 Tim Yakteen 及 Sean McCarthy 手上，而最終入圍打吡兩匹馬都係出自 Tim Yakteen，先講 #12 Taiba 兩戰全勝，第二次上陣就贏聖雅尼塔打吡，咁嘅部署當然令人諗起 Justify，而事實上 Taiba 短短兩仗，從當地不同系統計算出嘅 Speed Figure 分數，都係近乎冠絕全場，跑法具彈性而排 12 檔更可避免食太多泥頭，各樣條件都幾四正，當然都明白要第三次出賽就贏打吡難度極高，但當地一直只係第三四熱門其實都有少少意外；另一匹前巴富達馬 #6 Messier 轉歲初出於三級賽大勝 15 馬位，但再出跑聖雅尼塔打吡就不敵廄侶，排 6 檔想贏就只能夠複製前屆 Authentic 跑法，一口氣搶到最前放頭。

大熱門落喺 #10 Zandon 身上，新勝藍草錦標，擅長後上制敵，但翻查近年打吡頭馬跑法，全部清一色守前三位出彎，如果 Zandon 今仗繼續選擇留前鬥後，相信會係一匹穩陣跑入三甲嘅馬，但好可能追剩一兩匹而贏唔到。另一匹熱門 #3 Epicenter 一早儲夠分入圍，上仗路易斯安那打吡更加試新跑法，刻意稍留食泥，直路依然輕勝，但排位抽到 3 檔就好難跑，因為外側將會有近 10 匹馬壓入，早段無可避免一定要用力保持位置，練馬師艾蒙信從練多年仍未贏過打吡，今年有匹好馬在手，都的確需要運氣搭夠。

之後再數幾匹 100 分預賽頭馬，灰馬 #15 White Abarrio 於灣流戰線連贏聖牛錦標及佛羅里達打吡，上仗試用稍留食泥跑法，直路走勢稍欠鋒芒但總算贏馬而回，練者部署上拼搏有度亦值得加分，都屬於前列份子。#16 Cyberknife 上仗奇招攻下阿肯色打吡，但前速及總時間各項數字放落今仗始終比上不足，16 檔都有權慢慢游到上前列好位。活紀念冠軍 #1 Mo Donegal 新勝破紀錄時間，但今仗處境同 #10 Zandon 相若，都係後上型跑法，抽到 1 檔就更加肯定要全程食泥，難度太高。至於其他參賽馬都被上述幾匹重點賽駒擊敗過就唔多講。

最後再講兩匹外隊馬，日本馬 #7 Crown Pride 贏阿聯酋打吡入圍，水準未明，純講形勢，馬匹本身搶閘能力成疑，而且前速應該不及美國馬，理論上 7 檔十分蝕底，用到 Marche Lorraine 跑法先有望一爭；至於阿聯酋打吡亞軍 #4 Summer Is Tomorrow 有前速，但上仗跑 1900 米單逃去到最後一百都嚴重拉車，今仗就算放得出都冇辦法相信會捱到尾。