【大哲學家贏返場G2 條件賽精彩連場】

Tony

星期六焦點得表列賽若駒錦標,呢場得7隻馬上陣都係爆冷收場,之前喺札幌贏過1800米嘅Win Aglaia近兩場跑1600米都唔夠其他馬跑,今場上試2000米就試出彩虹,守住條內欄入到直路就搏走甩,影贏咗嚟個大外一氣嘅Variamente,健康冇乜問題啲獎金應該都夠佢跑橡樹架啦。
https://www.youtube.com/watch?v=M8w7Sh1CqCA

星期日兩場級際賽,先睇泥地嘅東海錦標,「日輪之神」(Inti)早段係咁走,頭1000米放到59秒幾咁快都知凶多吉少,結果入到直路用晒力就企咗喺度;反而Auvergne呢匹馬女喺前面跟足三段都仲未散晒,入到直路仲有力彈甩一段,後面成堆馬想追都埋唔到身,初戰二級賽即贏,仲拎埋二月錦標優先出賽資格。
https://www.youtube.com/watch?v=dtJTriu83cc

跟住到美國賽馬會盃,菊花賞亞軍「大哲學家」(Aristoteles)沿途跟住前面堆馬,入直路一掟彎蝕得少再趁前面對手腳軟先行突圍,另一對手「寰宇旅者」(Weltreisende)早段留後咗入到直路追極都追唔到,就咁贏返場二級賽。賽後幕後決定「大哲學家」按計劃跑多場之後出戰春季天皇賞,強手遠去之下呢個擂台躉佢就做硬架啦。
https://www.youtube.com/watch?v=Jizo-gn5ivQ

星期日亦都有唔少焦點馬出戰條件賽,當中有三駒報捷。首先係中山泥地1800米3勝條件賽,「美洲種子」(American Seed)自跑完皐月賞之後轉戰泥地2戰全勝,今場升班繼續成為佢嘅表演賽,起步快閘放頭一放到底,李慕華入到直路望下後面都知頭馬輕鬆到手,3場加埋血洗17個馬位。始終出自Tapit呢個父系,跑返泥地梗係㩒住拎!
https://www.youtube.com/watch?v=v5cIb5Vp3c4

跟住就到細細粒馬女「山茶花」(Melody Lane)休息半年之後復出,嚟到小倉跑2600米嘅2勝條件賽,入到直路就搽咗上前面控制大局。幕後話如無意外應該會跑2月27日阪神跑3200米嘅3勝條件賽,到時睇下可唔可以脫穎而出成功再升班。
https://www.youtube.com/watch?v=--rLhlHXYBs

最後中京嘅2200米1勝條件賽有「至潮熱點」(Robertson Quay)守尾門,呢匹神戶新聞盃季軍落返嚟1勝條件賽啲對手弱咁多睇住嚟食都冇問題,伊藤工真今場識得移定出外檔,終點前先將對手趕過,下次升班可以繼續留意。
https://www.youtube.com/watch?v=X934egNUAmk

Photo: Netkeiba