【外流學法】日本年輕好手團野大成將到英國學法

Homan

22 July 2021, 5:56:31 am

出道三年既日本騎師團野大成表示將於九月中前往英國學法,預計會於日本缺陣一段時間。

團野大成表示會於英國新市場韋利安馬房學藝,由於簽證關係,今次相信唔會有機會於當地客串上陣,而主力透過操練及馬房日常運作,以了解更多唔同地方既賽馬文化。今次外流得到師父齊藤崇史既支持,並認為如果為左將來發展,應考慮逗留更長時間。團野就表示今次希望留大約五十日左右,除了解當地馬房運作外,亦藉機了解下次客串策騎時需要注意既地方。而川田將雅亦曾到韋利安馬房學藝,韋利安妻子為日本人,或有助溝通。

除左大部分時留係新市場,佢亦會參觀各項大賽,重點當然係師父訓練既「創世駒」(クロノジェネシス,Chrono Genesis)出戰既凱旋門大賽,佢亦會去睇10月中既英國冠軍錦標賽日,以擴闊眼界。

被問到今次外流預計會遇到既困難,佢話相信係要自己一個處理曬衣食住行,同埋要用英文溝通。雖然佢有學過下,但都無信心去同當地人溝通。希望團野一切順利。

團野大成出道至今合共取得120場頭馬,當中上年取得65場頭馬,排日本騎師榜15位。

Source: sponichi
Photo: 福島雌馬錦標賽後訪問截圖