【墮馬意外四日後】三騎師情況好轉 「妙發靈機」回日休養

Homan

16 December 2021, 3:23:47 am

香港短途錦標墮馬意外受傷嘅賽駒及騎師情況好轉,並已經開始踏上復康之路。

日本賽駒「妙發靈機」(Pixie Knight,ピクシーナイト)賽後被驗出左前腳橈側手根骨剝離骨折(或稱撕裂性骨折)。琴日佢已經搭乘飛機飛抵日本關西機場,並會先行到三木Horse Land Park檢疫,相信完成檢疫後會到牧場放草休養治療。

騎師方面,日本騎師福永祐一左鎖骨骨折,佢將會由專人陪同回國治理,預計今明兩日出發回國。

而騎師潘頓喺意外一日已經出院,其肋骨雖然骨裂,但似乎情況日漸好轉。佢早前於晨操露面,並指自己喺睇左專科後,希望自己可以喺下月5號復出。佢下星期就會開始接受物理治療,並會於一星期後到專科覆診,如情況理想,佢預計自己可以喺三星期後重上馬背策騎。

而南非騎師希威森亦喺琴晚傍晚已經出院。佢於墮馬後被驗出有輕微腦出血、盤骨骨折。但由於狀況輕微,佢並不需要接受手術。早前佢已經接受過電腦掃描及磁力共震檢查,稍後會有詳細結果,到時就可以更清楚預計其康復日期。

Source: HKJC, SCMP, netkeiba
Photo: @LyleHewitson