【坐低啦岩田望來】影子歌姬終於贏返場G2

Tony

20 October 2021, 7:22:10 am

今個星期除咗秋華賞之外,東京有府中牝馬錦標同「長山之馬」復出戰。

星期六上演府中牝馬錦標,社台一口出3隻,一對熱門「魔法城堡」(Magic Castle)同「添翼」(Des Ailes)跑到報失;反而暑期贏過中京紀念嘅Andraste初戰G2有驚喜,一出閘見岩田望來搶上前守住第2位,入到直路首先突圍,呢場仲唔袋硬?結果後面整隻「影子歌姬」(Shadow Diva)出嚟,話晒都叫馬女限定賽連番入位,級數都有保證,留後爆一段終點前岩岩好過咗Andraste拎走女皇盃優先出賽資格,岩田望來要贏重賞等多轉啦!
https://www.youtube.com/watch?v=KsTNDBA1i5w

星期日另一場東京High Jump,欄王「長山之馬」(Oju Chosan)今場傷後復出、年屆10歲仲要揹住62kg讓人哋磅嘅情況,仲要前面有隻Hokko Mevius狂放,要追過對手都顯得力不從心,入到直路追極都埋唔到身就好似「弦樂器」咁收慢保住一席第3,今場咁嘅表現都係時候要諗退役嘅問題;賽事就由高多芬名下、上場贏出東京Jump Stakes嘅Love and Pop再下一城,下場會唔會出戰中山大障礙同一眾高手較量?
https://www.youtube.com/watch?v=HAwCniGkOV4

到今個星期跟進馬,星期日秋華賞之前一場3勝條件賽,上年以大原錦標名義由秋華賞除外馬「麗冠花環」(Lei Papale)勝出,自此扶搖直上贏埋一級賽,今年以西宮錦標名義就到「吉典娜」(Geraldina)發威,呢匹報名秋華賞連抽選資格都冇嘅良血馬改跑呢場,福永祐一今次冇甩轆留住隻馬走生位,入直路等另一匹除外秋華賞嘅Tagano Passion走甩先再爆上嚟,彃甩埋一齊衝上嚟嘅「大奇蹟」(Izu Jo no Kiseki),成功三連勝。
https://www.youtube.com/watch?v=Bi-WigoSogI

另一場阪神1200米未勝利賽,就有藤田晉做馬主嘅Dugat出場,之前又跑公開賽又跑G3,今場再跑返未勝利賽,其他對手都最少差佢一班;一出閘上到前放頭,跑到半路都知佢已經贏,直路齋騎幾下彈甩晒對手,大勝4個馬位返嚟,出道第4場先贏到,下次又會點部署?
https://www.youtube.com/watch?v=axrwuIM_0qw

知舍POG方面,先講一場東京嘅1800米新馬賽,「鐵鳥翱天」全弟Sunset Cloud終於登場,同場仲有一匹Epiphany都係今場有人揀嘅馬,加埋有6個人都有份爭分,點知係買大細開圍骰通殺,兩隻都贏唔到:大家都係沿途走差唔多位,入直路前面已經有馬走甩咗都仲輸成四五個馬位開外,點追?Epiphany終點前如狼似虎追返個第2,Sunset Cloud撻極都冇反應結果跑第5。結果係開邊粒圍骰呢?上年出戰三冠嘅「超強引力」(Black Hole)半妹Lilac是也,出閘夠快守住前面四五位,入直路杜滿萊一路騎住一鞭未打,對住隻放頭馬話過就過,贏得出色。
https://www.youtube.com/watch?v=909RP2_E4nk

2隻POG參戰馬今個星期贏馬幫參賽者加分,先係星期六另一場東京雌馬1600米新馬賽,Erika Vita一出即勝,P9兄又贏一場;Homan名下就有「前人足跡」(Songline)半妹Teegarden喺星期日東京雌馬1600米未勝利賽中輕鬆補中。
https://www.youtube.com/watch?v=Qys1hfXmT-o
https://www.youtube.com/watch?v=zBInxv4WqPM