【地太硬容易傷?】數匹日本橡樹打吡參賽馬告受傷

Homan

3 June 2022, 5:19:14 am

啱啱過去嘅兩個星期日,日本先後上演日本橡樹及日本打吡大賽。賽後有幾匹參戰都出現不同程度嘅受傷。

先講日本橡樹大賽,橡樹大賽冠軍Stars On Earth(スターズオンアース)先被發現右前腳出現骨折,原本預計於6月1號做手術將碎骨取出,並開始休養。但進一步檢查後發現,左前腳亦出現骨折。結果要喺琴日為左前腳取出碎骨。

社台預計休養三個月,未知能否趕及出爭三冠尾關。其父「大鳴大放」(Duramente,ドゥラメンテ)亦曾於贏得兩冠後出現一對前腳受傷嘅情況。

而日本打吡參賽馬方面,至少三駒賽後出現受傷情況。先講日本打吡大賽亞軍「春秋分」(Equinox ,イクイノックス),佢嘅傷勢對比下比較輕。佢嘅左前腳肌腱有腫脹,暫時無出現肌腱發炎嘅情況。練馬師木村哲也就表示預計要抖番一段時間。同馬房嘅皐月賞冠軍「地標圖形」(Geoglyph,ジオグリフ)就右前腳球節出現骨折,需要施手術取出碎骨。佢地預計要休養三個月並會以秋季復出作為目標。

而日本打吡第十三名嘅「摩天威獅」(Matenro Leo,マテンロウレオ)嘅左橈骨出現骨折,暫時未知要幾耐先可以完全康復。該駒為今年如月賞冠軍。

今年兩場經典賽完成時間都好快,可能因為咁而令一啲賽駒頂唔順受傷。希望佢地可以盡快康復。

Source: サンケイスポーツ
Photo: 日本打吡截圖