【土地不足】英國新市場馬房範圍或受太陽能發展計劃影響

Homan

10 February 2022, 8:33:34 am

英國新市場環境清幽且面積相當大,唔少馬房、牧場都設喺呢度。同時亦有唔少賽馬從業員於當地居住。由於呢度嘅設施係世界一流,亦會吸引世界各地賽馬從業員前來學法。

隨著社會發展,新市場一啲地區都被要求開發作其他發展用途。大約兩年前,發展商希望可以喺新市場Hatchfield Farm地區興建400個房屋單位。雖然新市場嘅賽馬團體反對,亦有評論指此舉會影響新市場於賽馬業嘅地位。但當局無動於衷,落實於當地興建房屋單位。

而Racing Post琴日報導,新市場再次被發展商睇中,太陽能發展商Sunnica入紙申請Limekilns訓練中心鄰近2800公畝土地,作為建設太陽能設施用途。Sunnica指此舉係協助英國政府達到2050年零碳排放嘅目標。佢地係入紙申請時已包含環評報告,亦已考慮對當地環境嘅影響。

不過,這項方案不但得到當地賽馬團體如英國馬會、達德素及高多芬等聯合反對,更令當地議員費解。當中West Suffolk議會議員及前新市場前市長Rachel Hood就話2800公畝土地分配比低效嘅太陽能板,將會對當地賽馬行業帶來負面影響。如果仍然想保持新市場成為賽馬世界中心,就唔應該接納Sunnica為鄰。

由於方案啱啱先入紙,相信都要等一段時間先有結果。睇下稍後嘅討論會有咩結果喇!

Source: Racing Post
Photo: Racing Post