【圍牆決戰】冠軍賽馬日報名馬公布 「加州星球」報曬呢兩場

Homan

28 March 2022, 1:00:54 pm

今屆冠軍賽馬日喺下月底舉行,礙於疫情將唔會有海外賽駒來港參戰。另外,從化香港兩地運輸仍來恢復,隨時只有現時喺香港嘅賽駒可以出戰,不過呢個都係後話。

三項一級賽主席短途獎、冠軍一哩賽及女皇盃都有至少有十駒報名。當中比較特別嘅係打吡亞軍「加州星球」,練馬師告東尼同時為佢報名出爭主席短途獎(1200米)及冠軍一哩賽(1600米)。佢將喺呢兩項賽事中抉擇。你地又覺得佢跑邊場會比較好呢?

打吡冠軍「浪漫勇士」如打吡賽後訪問所講,報名出戰女皇盃。對手當然有香港金盃冠軍「將王」。另外,香港金盃亞軍「玖寶」及「超級軍團」等都有報名出戰。呢項全個冠軍賽馬日最高獎金賽事共有十匹賽駒報名。

冠軍一哩賽就有十一駒報名,除左頭先講到嘅「加州星球」外,上屆香港馬王「金鎗六十」都有報名出戰,佢將會喺下月初嘅主席錦標中熱身。另外,今季勢如破竹嘅「超好日子」及粉碎「金鎗六十」連勝夢嘅「夏威夷」都有報名出戰。

最後就係報名馬數目最多嘅主席短途獎,合共有十五匹。除左「加州星球」外,三匹季內年長馬短途一級賽盟主——香港短途錦標冠軍「顯心星」、百週年紀念短途盃冠軍「當家猴王」及女皇銀禧紀念盃冠軍「福逸」都有報名。如果「加州星球」轉跑一哩的話,全數報名馬都可以有出賽權,睇下幕後嘅決定如何喇!

各場報名馬名單可以睇下面嘅圖。

Photo: HKJC
Source: HKJC