【國際騎師錦標賽】八海外騎師名單公布 澳紐英法日南非代表榜上有名

Homan

18 November 2021, 6:51:52 am

香港國際賽週臨近,不斷會有來港賽駒嘅消息。而於12月8號舉行嘅國際騎師錦標賽,香港馬會就公布左騎師賽名單。

除左上屆冠軍潘頓及上季冠軍騎師莫雷拉外,來自6個國家8位騎師亦會出席呢項一年一度嘅盛事。英國代表有莫雅、馬昆及杜苑欣。而法國就有巴米高,佢今年成績相當出色,現時於法國騎師榜帶頭。由於早前排第二嘅紀仁安宣布會放假至明年初,相信佢可以贏得今年法國冠軍騎師。

而紐西蘭就有麥道朗做代表,澳洲則由連達文代表出戰。稍後來港展開客串嘅希威森就會代表南非,另外日本就有川田將雅做代表。呢8位騎師都曾經黎過香港上陣,相信對跑馬地馬場唔會感到陌生。

另外,餘下兩個名額就會由今季騎師榜排名最高的騎師及今季成績最好的本地培育騎師爭奪(成績以11月24號為止)。前者因潘、莫二人已於騎師賽名單之上,將會由田泰安(15場頭馬)、巴度(14場頭馬)、或何澤堯(12場頭馬)爭奪。如何澤堯爭到前一個名額,就會由蔡明紹(12場頭馬)、梁家俊(10場頭馬)或周俊樂(9場頭馬)其中一人獲得。

睇下呢12位騎師邊個可以贏到呢項騎師賽。

Source: HKJC
Photo: HKJC