【國際騎師錦標賽】兩冠軍級騎師或參戰 但仲有一關要過

Homan

28 October 2021, 2:05:45 pm

香港國際賽於12月中舉行,第一階段報名琴日公布,始終水分甚多,詳談意義不大。

上屆嘅香港國際賽於Racing Bubbles下舉行,來港人員需遵守嚴格防疫要求,禁止外出,並由專人接送往返馬場。今屆馬會有意照辦煮碗,但近日政府一決定令馬會擔心今屆國際賽未必可以於Racing Bubbles下舉行。

近日政府為左爭取港中兩地通關,宣布將取消大部分豁免檢疫群組,外國人員來港或受影響。據SCMP報導,由於具體政策仍有待公布,馬會現時仍持觀望態度,希望外國參賽馬、馬房隨人員及騎師可以前來參賽。

而馬會亦希望12月8號國際騎師錦標賽回復到有8位外國騎師參賽。現時英國冠軍騎莫艾誠有意來港參賽,而NSW冠軍騎師麥道朗會係馬會嘅邀請對象之一。當然大前提係得到政府允許國際賽可以於Racing Bubbles下舉行。


Source: SCMP
Photo: HKJC