Tony

1 February 2021 at 3:34:36 pm

今個星期嘅日本有兩場三級賽。

星期日中京有絲路錦標，呢場三級賽對之後嘅高松宮紀念都好有參考價值。「喜雅王」(Shivaji)同「好合時」(Right on Cue)喺直路一內一外衝上嚟，結果勝負分野都係在於磅位，輕磅少少嘅「喜雅王」成功突圍先勝一仗。至於「禮讚歌詠」(Lauda Sion)縮落嚟1200米前速係有，不過最後幾步連「好合時」都過唔到有少少失望；「魔族閃焰」(Mozu Superflare)跑得麻麻全因場地唔多利放，等到正賽先見真章。
https://www.youtube.com/watch?v=tYgUCcFXKD0

東京就有根岸錦標，上次香港國際賽日出戰三級賽得亞軍嘅Red le Zele就上演觀塘道塞車記，喺條直路塞完一次又一次，最後先有位衝上嚟同行緊觀塘繞道大外一氣嘅Wonder Lider鬥爆一段，結果岩岩贏個頭位取得二月錦標優先出賽資格。賽後幕後決定照跑二月錦標，睇下可唔可以幫「龍王」呢個父系贏埋泥地G1啦。
https://www.youtube.com/watch?v=33x9oM_B4rY

跟住到跟進系列，友道康夫嘅古馬群組就好馬多多，但係安排乜嘢賽事比啲馬跑就頭都大埋。嚟緊又有一匹Potager上緊位，呢匹金子真人陣營嘅馬跑完主角錦標第2之後，8月開始就嚟個3連勝，嚟到星期六嘅白富士錦標，憑住個輕磅步步壓住入面Franz同出面嘅Sanrei Pocket，成功4連勝。賽後會以金鯱賞為目標，要同三冠馬后「謀勇兼備」(Daring Tact)同同馬房嘅「笑一笑」(You Can Smile)跑，夠唔夠班以下犯上呀？
https://www.youtube.com/watch?v=Cqy8KTgElE4

至於之前轉播賽日見過嘅馬，又有一匹報捷。星期日中京3勝條件賽，「沉醉節拍」(Heat on Beat)上年差唔多個個月都見到佢跑，嚟到今場見池添謙一出盡九牛二虎之力岩岩喺終點前追到Neptunite，喺3勝條件跑第3場終於升班；不過直路上池添謙一由得隻馬斜跑阻到對手飛起要停賽2星期，二月錦標隻「天域龍馬」(Air Spinel)都要換人上陣。
https://www.youtube.com/watch?v=ud5UTCAq_aw

Photo: Netkeiba