【呢度係馬主主場】絲路錦標齊叫好四奪重賞

Tony

2 February 2022, 2:11:17 pm

今個星期日本有兩場短途三級賽。

首先係中京嘅絲路錦標,上年短途馬錦標第4名、出晒名陣上搶口搶到阿媽都唔認得嘅「齊叫好」(Meikei Yell)年內初出,池池謙一收復啲搶口馬特別有一手,當年「黃金巨匠」都控得掂,冇理由「齊叫好」唔得啦?結果不負所託,3檔一起步搶上前比隻15檔「不凡」(Bien Fait)上前放,自己留喺內欄第4位,入直路一開門就自動波追上前最終頂到完場。馬主名古屋競馬,亦即係中京競馬場管理者首次喺自己主場贏得重賞。「齊叫好」下場將會沿用池添出戰高松宮紀念,睇下可唔可以再為馬主喺主場發威。
https://www.youtube.com/watch?v=I8dQi88zTMM

之後到東京嘅泥地賽根岸錦標,「竹園南帝」(T M South Dan)上年贏過3場地方交流賽,今次返到中央跑三級賽一樣不成問題,一路守住中間位置,到直路一開門就見岩田康誠騎上嚟好好反應,head住隔離「太陽神輝」(Helios),終點前過埋一路放頭嘅「俊男孩」(Justin),幫岩田康誠贏出第1700場中央頭馬,拎埋二月錦標嘅優先出賽資格。
https://www.youtube.com/watch?v=wZsEjaalDHY

知舍POG方面,今個星期就得1匹馬贏到,就係Pat Tsang名下嘅Argenteus。呢匹身價32,000日圓/500口嘅絲綢會一口馬星期六初出用上武豊用跑東京新馬1600米,起步留到落包尾位置,入到直路抄出去中間空檔衝上嚟爆一段33秒4,終點前岩岩好過晒前面對手,幫Pat Tsang賺600分。知舍POG全個1月都有唔少頭馬交出,總成績仍然係Ramos領先緊,Patrick同Pat Tsang分列二三位。嚟緊2月開始進入預賽期,唔少參賽者都會有馬跑重賞力求搶分,戰況係點就唔好錯過日本戰報!
https://www.youtube.com/watch?v=cPKLO6d3S-M