超

21 December 2021 at 10:01:07 am

霍利時宣佈將會喺星期三賽事後告別香港馬壇，結束在港18載練馬生涯。

霍利時係南非著名練馬師霍奧文（Ormonde Ferraris）之後，1995年接手父親嘅馬房，以32歲之齡成為練馬師，期間不但四奪南非冠軍練馬師，更訓練出兩匹馬王「經典旗幟」同Celtic Grove。直到2003年，霍利時毅然放下喺南非嘅事業，前來香港開倉，展開練馬生涯嘅新一頁。

喺佢近二十年嘅香港故事入面，最大成就必須要數到一代馬王「爪皇凌雨」。

「爪皇凌雨」喺霍利時開倉首季以自購馬身份來港服役，雖然當季雖然未有贏馬，但馬匹就如練者一樣嶄露頭角，季尾連續兩場入位。去到第二季，霍利時馬房整體表現有進，而「爪皇凌雨」亦喺轉歲後大放異彩，不但成功攻下香港打吡大賽，更加喺女皇盃力抗群雄，成為首匹可以同季贏出香港打吡大賽同女皇盃嘅馬。「爪皇凌雨」之後再捧走遮打盃，季內三奪一級賽，霍利時喺開倉第二季即刻完成以上成就，可謂絕非易事。

「爪皇凌雨」於2005年出戰香港盃，面對住英國冠軍錦標亞軍「自豪」同衞冕冠軍「歷山金駒」，作為港隊希望嘅佢不負眾望，喺主場成功擊退一眾名駒贏出香港盃，更加成為2005年世界錦標巡迴賽冠軍。「爪皇凌雨」2006年雖然未能蟬聯香港盃，但就喺香港金盃就擊敗另一匹馬王「爆冷」再奪G1。及後「爪皇凌雨」選擇遠征杜拜，最終成功擊敗「西方啟示」同「躍升」贏出杜拜司馬經典賽，成為首匹贏出海外2000米以上G1嘅香港馬，同季正式登基成為香港馬王。「爪皇凌雨」不但係曾經係香港馬匹累積獎金最高紀錄保持者，更加成功向世人證明香港並非只有短途馬，即使係中長距離亦都可以喺世界舞台佔一席位。霍利時作為訓練出呢匹世界馬王嘅練馬師，可見霍利時嘅功力。

除咗「爪皇凌雨」之外，霍利時亦訓練過香港經典一哩賽冠軍「甜橙」以及遮打盃冠軍「智多飛」，而前者近年開始有子嗣來港服役，包括一出即勝嘅「大軍閥」。此外，早年曾奪最佳新馬並遠征澳洲嘅「熊英雄」亦係由霍利時訓練。即使霍利時近年旗下賽駒質素不如以往，但有啲賽駒都有一定人氣，就好似港澳盃亞軍「比卡超」，雖然馬匹本身並非馬王級，但馬匹喺高班賽事角逐時亦不時交出驚喜表現，總共喺香港贏出六場賽事。

從練多年以嚟霍利時一直有一班長期支持佢嘅馬主，就好似「趣」系多年來嘅馬匹都只曾交俾霍利時訓練。霍利時在港從練首場頭馬「查士丁尼」，正正就係「趣」系馬主黃頌顯所擁有。另外，「熊」系馬主范邦初本身同霍利時關係良好，除咗上述嘅「熊英雄」外，近年所有「熊」系賽駒如「又係熊」、「戰熊三千」都只交由霍利時訓練。

霍利時除咗係一個練馬師之外，亦係一位好爸爸。雖然囝囝霍宏聲年紀尚輕，陣上經驗亦相對較少，但霍利時仍然將馬匹交俾霍宏聲策騎。贏出賽事之後，平時帶點內斂嘅霍利時亦都抱起囝囝，場面溫馨之餘，亦反映到霍利時嘅父愛滿溢，一切盡在不言中。

雖然短期內唔會再見到霍利時抱起囝囝嘅場面，但喺到都希望霍利時日後發展順利，以外隊身份挑戰香港各項大賽，甚至同囝囝父子合作，喺香港贏出大賽。