【同泥地和解】何澤堯首週獲首勝 次週獲首項級際賽頭馬

Homan

8 August 2022, 4:07:03 am

香港騎師何澤堯繼續客串之旅,今個星期繼續喺新潟上陣。全個星期共策11駒上陣,取得一冠一亞一季。最重要係頭馬喺三級賽獵豹錦標(レパードS)取得,佢策Kafuji Octagon(カフジオクタゴン)贏馬。Kafuji Octagon亦成為第一匹取得泥地級際賽冠軍嘅「滿樂時」(Maurice,モーリス)嘅子嗣。

繼上週首勝接受賽後訪問後,今個星期亦因勝出級際賽接受賽後訪問。佢自己就話今場策騎嘅馬需要喺外檔起步,早段取得好位需要一啲運氣。今日嘅場地相當適合Kafuji Octagon發揮,而且賽駒亦唔怕踢起嘅泥頭,所以早段可以喺一個唔錯嘅位置慳位等候機會。

末段佢同另外兩駒鬥得相當激烈,以相當短距離分勝負。佢自己就都好享受呢場比賽帶來嘅刺激感。佢認為自己逐步熟習到唔同日本嘅新事物,包括日本嘅泥地跑道,佢指出呢度嘅泥地賽道嘅沙鋪得比香港更深。佢而家鍾意多番啲呢度嘅泥地跑道喇!

雖然香港嘅夏天都好熱,但上星期新潟都相當熱,今個星期氣溫回落左都舒服番好多喇!就住今個星期可以贏到級際賽,佢就話自己相當多謝支持佢嘅練馬師矢作芳人、馬主及經理人,尤其經理人為佢搵到唔少優質嘅坐騎。當然都好多當地馬迷支持,如果無佢地嘅支持,當地賽馬運動唔會咁精彩。

另外,佢亦都好多謝當地騎師嘅協助,令佢可以好快適應到當地賽事模式。最後當然再次多謝JRA接納佢可以喺當地客串,佢自己仍然適應緊唔同嘅新事物,但會盡力而為。下週佢會喺小倉上陣,亦會喺主題賽事三級賽小倉紀念賽有坐騎。

今個星期何澤堯爆冷贏馬,日本馬迷又點睇呢?

「ホーJは意外性があるな 人気薄はかなり怖いかも(;^_^A 今後は注意しよう!」
翻譯:何澤堯有令人意外嘅一面,騎冷門馬果陣可能會好可怕,要好好留意!

「その騎乗を昨日からやってくれと言いたいがやっとコツ掴んだ感じかな」
翻譯:(何澤堯)或者由琴日(星期六)開始已經搵到要訣。

「ホー うまい!」
翻譯:何(澤堯),做得好!

「某掲示板で香港のジョッキーはダートは乗れないって僕に教えたヤツ
恨んでやる(´;ω;`) 」
翻譯:某留言板話香港騎師唔識跑泥地嘅,我憎恨你呀!

留言出自:https://db.netkeiba.com/?pid=horse_board&id=2019105656&page=1

フジテレビ訪問:https://www.youtube.com/watch?v=6_vOjzCakM4

Source: JRA, netkeiba, フジテレビ
Photo: フジテレビ截圖