【史文夫沙地盃用鞭過度遭重罰】

鹿

打咗 14 鞭,停賽 9 日,罰金超過 20 萬美元(港幣超過 150 萬),真係罰咁重?

首屆沙地盃戰果塵埃落定,賽後新聞亦都一大籮,其中一單受關注嘅新聞就係美國名將史文夫(Mike Smith)用鞭過度被罰。

史文夫於沙地盃策騎應屆美國馬后 Midnight Bisou 跑第二,直路上用鞭 14 次,而當地賽事規例只限打 10 鞭,換言之史文夫打多咗 4 鞭,賽後史文夫先按例被罰停賽 8 日,之後再額外加罰多 1 日,合共停賽 9 日,並且從該仗所得獎金當中沒收 60% 作罰金。

沙地盃作為現時全球最高獎金嘅一場賽事,跑第二名馬匹可得 350 萬美元獎金,當中騎師佔 10% 亦即 35 萬美元,史文夫被罰走 60% 獎金即等於痛失超過 20 萬美元獎金,折合港幣超過 150 萬,暫時未肯定是否賽馬史上同類罰則中最高罰金但相信都不遠矣。

除史文夫之外,奧天信、莫艾誠同樣於沙地賽期因用鞭過度而被罰。莫艾誠亦因此有機會缺席黎緊既杜拜超級星期六賽事,佢正申請因要參加級際賽而延遲執行停賽期。

14 鞭對於香港馬迷而言應該屬家常便飯,但對於動保意識可能相對較高嘅歐美地方又未必可接受,從網上留言可見,有人覺得限 10 鞭都嫌多,有人認為罰得太重,有人話規矩就係規矩等等,事實上用鞭限制於全球馬圈一直各有爭議,掉番轉頭站於騎師角度而言,策馬競逐沙場上,既考體能又考智慧,直路上積極爭勝之時,竟然要花腦汁去數自己打幾多鞭,又是否合邏輯呢,的確係拗到天光都未拗完。

(Photo: The National Sport)