Tony

29 September 2021 at 10:22:20 am

短途馬錦標前夕，日本繼續上演二級賽。

星期日中京有神戶新聞盃，星期六都幾好天氣不過嚟到星期日就落住雨掛不良地跑，打吡盟主「大帝」(Shahryar)跑落去反應麻麻地只得第4，Tony品題嘅Sefer Rasiel跟都跟唔住大隊連影都冇埋；結果都係淋地有根據血統有著數，「星光速」(Stella Veloce)呢匹「緬甸皇城」子嗣直路上搵到空位殺上嚟，力壓「赤駒創世」(Red Genesis)取勝，同第3嘅Monte Dio一齊出線菊花賞，只係今日有消息話「星光速」未必跑菊花賞，下場可能係跑日本盃。
https://www.youtube.com/watch?v=SCHb8wIRM-o

中山呢邊就有產經賞，「麗冠花環」(Lei Papale)繼續跑2200米賽事捧成大熱，沿途守住boxseat睇落唔錯入到直路出頭仲塞一塞「瑪蓮必勝」(Win Marilyn)個位，不過最尾都係腳軟只跑梗勁4。「麗冠花環」下場照跑女皇盃，跑到2200米似乎有少少嫌長；「瑪蓮必勝」今年贏緊2500米日經賞，跑少300都唔係問題，橫山武史直路揀入去比「麗冠花環」阻咗一下，再抽返出去「麗冠花環」同「耀滿瓶」個空位衝上嚟過晒都幾精彩，沿途跟住「瑪蓮必勝」後面嘅「感激必勝」(Win Kiitos/暫譯) 喺直路爆一段趕過「耀滿瓶」得亞軍，開出呢條3歲條件賽翻版Q，兩駒下場都跑女皇盃，三匹馬女到時同場再鬥過。「耀滿瓶」今仗復出，如果杜滿萊早段留得太後搞到要中段踩油用晒力今場應該係佢贏，呢個第3表現收貨有餘，年尾日本盃或香港國際賽可以預埋佢一份。
https://www.youtube.com/watch?v=bKLTaikXaLg

跟進馬方面，上次函館初出跑2000米新馬賽事即勝的馬女Rond，星期六就出戰中京2000米公開賽野路菊錦標，起步已經夠快閘，轉彎走住三疊都唔驚呢班對手，結果以破紀錄時間1分59秒2大勝一場，武豊去法國跑凱旋門前都可以贏馬壯行色。Tony評呢隻馬其實進度都嚟得快，出年雌馬三冠應該都會見到呢匹Silver State子嗣身影，松島正昭次次買啲水貨比武豊騎，希望呢隻唔會跣到武豊同各位觀眾癱癱腰啦！
https://www.youtube.com/watch?v=AijnVrxk_Mw

知舍POG方面，Satono Helios星期六喺中京2000米未勝利賽中沿途未受太大考驗，入直路抄內欄話過就過，後面對手都埋唔身，結果以破紀錄時間2分正補中 (不過紀錄唔夠一日已經比人破咗)，幫Patrick同Roy兩位加分，而Tony星期日兩匹參賽馬都冇分。總結成個月Ramos以4280分放頭，Roy同Patrick靠出得馬多係咁入P密食當三番守住二三位，不過唔使咁開心住，仲有咁多個月慢慢比大家玩，繼續讓子彈飛先。
https://www.youtube.com/watch?v=hbZMPyOkCUc