【古川吉洋臨危受命贏G2】

Tony

27 April 2021, 3:24:00 pm

睇完女皇盃賽馬日,一齊返去睇三場日本馬。

今期講三場級際賽之前,先講下新騎師,今年8個出道新騎師入面唯一未贏過嘅西谷凜,星期日喺新潟嘅未勝利賽事終於開齋,8個新騎師出道近2個月全部開齋亦係史上第4快紀錄。

星期六先有三級賽福島牝馬錦標,「民族服裝」(Dirndl)兩年前都係跑開短途為主,上年就越跑越長跑到上2000米,今年跑細場1800米繼續有好表現,嚟到今場早段施展前速放頭,直路上就擺脫「聖域」(Sanctuaire)同「純潔女兒」(Figlia Pura)夾擊,川田將雅騎Donna Attraente直路發揮少少論盡,終點前齋推隻馬以為贏得點知都係差一步,結果「民族服裝」取得維多利亞一哩賽嘅優先出賽資格。
https://www.youtube.com/watch?v=pW152vLCTd0

星期日舉行兩場二級賽,首先係「冠軍一哩賽遺材賽」讀賣一哩盃,香港呢邊就冷清姐,日本就熱鬧得多,有15隻出賽。岩田康誠被罰即時停賽 (見另文) 令Cadence Call換上古川吉洋上陣,古川亦都不負所托,沿途留住隻馬係後面,入直路三兩下就過晒對手,可以講句安田紀念I'm coming!Cadence Call年初贏完京都金杯,又喺中山紀念上名,今場證明埋唔止左轉,右轉都贏到比你睇,嚟緊安田紀念返去跑左轉有力威脅「放聲歡呼」(Gran Alegria);至於上場金鯱賞贏「謀勇兼備」嘅「天鐵」(Gibeon)都有份上陣,不過連跟前都跟唔到全程唔上唔落過終點,睇嚟上場只係偶然贏到,實際都係唔適宜秤得高。
https://www.youtube.com/watch?v=9dswOmbc7pY

東京嘅花仙錦標,17匹馬女爭2個橡樹出賽資格,之前戰報有提過嘅Snow Halation有份跑,不過進度唔夠對手太強結果行人止步;李慕華揀騎湖畔牧場出品、「班師回朝」(Triomphe )半妹Cool Cat上陣,直路上輕鬆趕過Slyly取勝,Slyly就力拒Uberleben來犯保住一席第二,成功出線。
https://www.youtube.com/watch?v=-vGqSDYagMw