【受武肺影響 日本賽馬閉門作賽】

Homan

27 February 2020, 5:17:58 am

受到武漢肺炎影響,日本賽馬今個星期起將會同香港一樣閉門作賽。

所有既投注站都會關閉。當地馬迷只可以透過電話及網上投注JRA既賽事。JRA就話佢地會以馬迷既健康為大前提。早係上個星期,JRA決定取消頭馬騎師既簽名活動,以減少人與人之間既接觸。

騎師四位洋文將會跑埋今個星期就會掛鞭,佢就話明白當局做法,認為阻止武漢肺炎傳播先係首要目標。雖然當局有問佢會唔會想延遲引退儀式,佢就話應該會按原定計劃,並會透過電視轉播傳達信息。

由於當地疫情急轉直下,JRA亦參考左其他運動既做法,如棒球(季前賽閉門作賽)及足球(延期至三月中)等。而地方競馬方面,由今日起,帯広、大井、名古屋、佐賀及園田都會閉門作賽,所有投注站都會關閉。措施會大約維持兩星期。

而當地其他可供投注運動,如競輪同競艇都會閉門作賽,場外投注處亦會關閉。日本近日確診人數上升得幾快,且不少為本地感染個案。唔少黎緊兩個星期既大型活動都取消,如東京馬拉松或剛過去星期一既天皇生日儀式。不過當地奧委會主席又叫人唔使戴口罩,情況令人擔心。而近日市面上則多左人戴口罩,有店鋪亦貼出告示話佢地既員工會戴口罩以防武漢肺炎既傳播。睇下呢啲措施可唔可以阻止疫情於當地蔓延。

Source: JRA