【又到咗搶優先出賽資格時間】

Tony

今個星期日本除咗櫻花賞,仲有三場焦點賽事重點報!

星期六上演兩場二級賽。首先係阪神牝馬錦標,Sound Chiara由年頭京都金盃贏到宜家,今次就沿途守住內欄等到直路搵到空位就衝上嚟控制大局,拎到下個月維多利亞一哩賽嘅優先出賽資格。連贏三場姿態都好輕鬆,相信到正賽就會係真正考驗佢級數嘅時候。「野田幻想」(Danon Fantasy)今場復出表現一般只得第5,入到直路就一直冇加速到終點;對比返上年櫻花賞同今場都有一個共通點,就係同步速偏快有關。差唔多檔位、差唔多跑法,唔同在今場前半段快而櫻花賞係後半段快,完全埋唔到對手身,輸法似足九成。希望今場係志在熱身,但係喺呢個馬房今場咁嘅表現難言樂觀。反而「橙紅色」(Scarlet Colour)走勢極佳,直路上收復大部份失地追返個第2,算係跑回水準,之後跑二三級賽亦可留意。

另一場係紐西蘭錦標,頭三名有NHK一哩賽優先出賽資格。今場由轉彎開始就精彩咯,Season's Gift入直路彎移出去阻到Luftstrom同Win Greatest飛起,但係都係比Luftstrom終點前趕過咗,Season's Gift只得第2,Win Greatest就第3。津村明秀比小組告誡了事,唔使停賽,不過果下干擾就似乎斷送Win Greatest嘅爭勝機會,咁樣阻一阻蝕唔少位架嘛。Luftstrom今場表現喺NHK一哩賽應該有力爭勝,相信最大嘅對手會係下星期復出熱身嘅Taisei Vision同每日盃得主Satono Impresa。

最後係跑櫻花賞之前嘅「前菜」勿忘草賞,係跑橡樹之前嘅重要熱身賽。結果就由一對櫻花賞落選馬包Q,沿途慳唔少腳程嘅Win Mighty喺終點前彈甩「大奇蹟」(Izu Jo no Kiseki)同Lily Pure Heart贏出呢場表列賽。Win Mighty今場跑得咁好,唔通橡樹就係岡田家內訌嘅戲碼?

重播:
https://www.youtube.com/watch?v=ifXNCuppMVw
https://www.youtube.com/watch?v=ZWSWzXN4EpE
https://www.youtube.com/watch?v=ZmTBJQ2X3yk