【又係野田】共同通信盃認住呢隻鯨

Tony

16 February 2022 at 6:34:35 am

今個星期日本舉行三場重賞，另一邊嘅POG戰況依然激烈。

講重賞之前先嚟個前菜，星期六阪神1600米表列賽洛陽錦標，「頌讚角宿」(Admire Virgo)呢匹Tony由出道跟到而家嘅高價馬，上年跑1800至2000米連大阪盃都跑埋，結果全年輸到0比6，今年一復出縮程落嚟一哩諗住賺級數仲唔贏？排位排個15檔睇完都覺得相當難跑，一起步見武豊搶前上去第4位睇落幾好，不過就走緊大圈，轉彎見武豊已經騎緊，入到直路就企咗喺度，結果跑個尾三返嚟；呢匹身價5億8000萬日圓落到嚟呢組都贏唔到都幾失望，係咪應該跑返正宗啲嘅2000米呢？講返場馬結果Air系又贏一場，由馬主喺美國自行培養嘅「空氣幻術」(Air Fanditha)前年喺菊花賞賽日跑1勝條件賽結果梗頸四，事隔一年已經喺條件賽畢業，今次升班第2場跑返阪神就合晒合尺，沿途留後慳咗位，入到直路自動波上前，前面幾隻馬成道牆喺度差啲就撞埋去，不過福永祐一嚟個修正撲上嚟，最後100米追返2個馬位同「有情莊園」(Darlington Hall)一齊過終點，結果影相影贏埋，嚟緊可以留意佢夠唔夠班挑戰級際賽。
https://www.youtube.com/watch?v=Ugsp7x9ZZ0k

東京星期六就有三級賽皇后盃，今場2匹POG參戰馬，Tony名下「勝出光采」半妹Win Eclair沿途走勢一般，入到直路打開晒門反應唔強，結果跑一席冇乜威脅嘅第6；Patrick名下良血馬Shosholoza就沿途守住內檔，入直路比La Ruelle攞咗個空位成隻抽起冇騎過就跑第11，大家都冇獎金。結果都係三大熱門排隊返嚟，上年10月初出即勝嘅Presage Lift隔3個幾月再出，13檔起步留到尾三位置，入到直路戶崎圭太拉出去嚟個大外一氣，同橫山武史騎嗰隻Stars on Earth鬥足最後100米，都係戶崎經驗老到，終點前壓線壓贏，Belle Cresta追返一席第3都算恰如其分。
https://www.youtube.com/watch?v=er7keFGPbmg

星期日就上演兩場戲肉，先係阪神開跑嘅二級賽京都紀念，「非洲寶金」(African Gold)上年年尾表現回勇，出戰中日新聞盃爆冷跑入一席第2，上場日經新春盃亦跑第5名，嚟到今場冇馬放頭咁大件事冇人講嘅？國分恭介話冇人講就不如我落手做自己放頭，頭1000米慢到1分01秒7，轉彎開始踩油彈甩對手，最尾800米開45秒9叫後面啲馬完全捉佢唔到，結果一放到底爆出51倍冷門。「非洲寶金」下場大阪盃續用國分恭介上陣，不過有馬王「樂透心」(Efforia)在前睇嚟都係做啦啦隊。Tony跟進嘅良血馬「吉典娜」(Geraldina)起步就留住留到尾二位置，當正前少少嘅「山嶺寶穴」(Sanrei Pocket)係假想敵，對面直路尾見前面唔對路就拎定出去發力，最後600米爆咗段全場最快嘅33秒6，到頭來同等入面慳位嘅「山嶺寶穴」一齊衝線仲要影輸個第3，兩隻後追馬連沿途守Boxseat位嘅Tagano Diamante都追唔過都有啲意外，但係之後再出都可以留意；橡樹冠軍「安身立命」(Uberleben)呢個第5幾失望，跟前跑但係入直路推騎反應一般比後面任過，咁嘅表現去杜拜有啲唔穩陣。

執筆之時正值香港金盃出咗報名，Tony望完個報名，再睇返場京都紀念，極有理由相信求其喺呢場拎一隻（唔包括「豐收節」(Makahiki)及Tagano Diamante）同「滂薄無比」(Hishi Iguazu)、「耀滿瓶」(Glory Vase)落嚟香港金盃都應該贏到。香港中長途賽事近年冇乜好馬，兩場2000米大賽近年成為日本ATM，望到呢一組大部份係上年12月香港盃同香港瓶嘅參戰馬，有「非洲寶金」造步速，「安身立命」、「滂薄無比」同「耀滿瓶」等做主力，呢個陣容過嚟贏香港金盃，甚至遮打盃根本不是夢（頭盔：所有防疫措施不考慮在內）。
https://www.youtube.com/watch?v=UMnTLBn66nY

東京就有三級賽共同通信盃，上年「樂透心」贏完呢場就再贏三場一級賽做埋日本馬王，今年又到邊個呢？今場Be Astonished呢匹冷門馬喺稍重地控制步速，後面啲馬都幾難追，不過有隻馬唔怕你慢放，上年11月贏出新馬賽嘅Danon Beluga由石橋脩換上松山弘平果然仲好，沿途守住第6位跟住Geoglyph後少少，轉彎入直路拉出去爆一段全場最快33秒6，最後100米已經彈甩Geoglyph控制大局，2戰全勝，呢個勢頭進軍三冠有冇得撼？而家圈定呢隻差唔多。幾匹熱門表現都幾失望，Asahi起步一個唔該慢閘就講拜拜；Danon Scorpion跟住大隊跑直路反應麻麻，會唔會諗吓返去跑一哩？
https://www.youtube.com/watch?v=mgsPvqoy08c

知舍POG今個星期就得一匹參賽馬勝出，Ramos名下嘅Conch Pearl出戰星期六阪神嘅泥地1勝1400米賽事，排住個16檔都唔怕，起步快閘仲要比佢埋到嚟放頭，轉完彎入直路再騎一段可以話大局已定，咁又幫Ramos執750分，總成績再甩開Patrick足足700分領先。
https://www.youtube.com/watch?v=xLP9eI2SwF4

POG遺珠就講星期日阪神未勝利2000米賽事，日本史上第3高價、2020年Select Sale以周歲價5億1000萬圓成交嘅Shonan Addeybb，出道頭4場全部跑第2，今場對住包括POG中船、「鐵鳥翱天」全弟Sunset Cloud在內嘅對手，沿途守住第6位，入到直路見池添謙一推落去好好反應，彈離對手1又4分3馬位勝出；Sunset Cloud起步慢半拍，入到直路推騎反應唔多之下只跑第5，幫Tony、Pat Tsang同南總執碎銀咋。
https://www.youtube.com/watch?v=rNlcCxVOiPM