Ramos

26 October 2020 at 3:37:40 am

雖然最後衝擊唔到三冠，但 Mighty Heart 本身的故事都非常勵志

剛過去的週六 (10月24日) ，於加拿大活拜馬場舉行途程為草地2400米的三冠尾關賽事 - 育馬者錦標 (Breeders' Stakes)，夥拍日本年輕騎師福元大輔的 Mighty Heart，已經先後於女皇碟及威爾斯親王錦標連過兩關，嚟到尾關當然希望能夠締造歷史啦。起步時，Mighty Heart 都係採取貫常的前領戰略競跑，但經過之前兩關的教訓，其他賽駒當然視 Mighty Heart 為假想敵，唔會俾佢走得咁輕鬆，結果喺直路上，Mighty Heart 未能再度加速，更被多匹賽駒越過，最終以第七名完成賽事，未能衝擊三冠，贏馬的為廄侶 Belichick。雖然其練馬師 Josie Carroll 包辦哂加拿大三冠的三關賽事，但美中不足的唔係 Mighty Heart 幫練馬師圓三冠夢。

講起 Might Heart，本身其背後都有一個不平凡的故事，喺 Mighty Heart 出世後兩週，因為一次喺牧場的意外，令佢失去了左眼。練馬師認為馬匹因為冇咗一隻眼而顯得唔夠信心，而馬主亦曾諗過放棄佢，但最後都對 Mighty Heart 不離不棄，到了今年，馬匹踏入三歲先正式出賽，初出跑入殿軍，但再出大敗而回，當時大家都研究係咩原因，結果發現因為馬匹有隻狼齒搞到佢覺得痛，剝咗之後，Mighty Heart就慢慢重回正軌，並且重拾信心，先於七月勝出處女馬賽，及後跑多一場季軍就進軍頭關女皇碟，亦係日本騎師福元大輔同Mighty Heart結下緣份之時。

賽事重播: https://www.youtube.com/watch?v=UrcxDalPudI
Story Source: World Horse Racing