【前香港服役馬「大有作為」七年後在澳初出】

Homan

喺2011至2013年於香港服役嘅「大有作為」,番到澳洲後一直未有出賽,直至今日。今日佢改左名做Fighting Heart,以會於Ipswich出戰1520米賽事。排位後已經引嚟注目。

澳洲媒體Racenet 就此訪問佢而家嘅練馬師 Kathy Gruenefeld,呢位女練馬師原本從事為一啲被認為受傷、跑得慢、跑唔番嘅馬做復康工作。如果佢哋未能再次出賽,佢哋會留喺Kathy度渡過餘生。Kathy於網上購入「大有作為」,並原本訓練佢成為馬術用既馬,為其生涯展開新一頁。

不過係訓練期間,佢發覺「大有作為」對競賽仲有雄心,並討厭落敗。因此為左佢而申請練馬師牌照。由於一直無相關文件,個牌搞左成三年先批,結果去到「大有作為」十二歲先可以初出。Kathy為佢做左試閘及經過獸醫檢查先可以出賽。現年十二歲既「大有作為」今場將會係最後一戰,由於八月轉歲既佢將唔可以於澳洲上陣。

Kathy都預計左今次再出賽會引黎各方批評,所以佢呢幾日都少上左社交媒體。而除左練馬師備受壓力外,佢都預計騎師都會備受壓力,雖然曾經一度冇騎師肯接,不過最後見習生Adin Thompson(-2kg)答應為其執韁,令原本要負63kg既「大有作為」可以孭少啲磅出賽,即61kg(134磅)。

故事被廣泛報導後,其倍率由67倍跌至26倍,其中一個莊家話獨贏內有四成投注都係買「大有作為」。

賽事將於香港時間12點18分上演,希望一切平安!

Source: Racenet