【利時事件簿】霍老爹散倉誰之過？回塘定馬會逼害？

Dylan

21 December 2021 at 10:18:07 am

2003年有一位南非練馬師毅然來港發展，更加喺第三季就訓練出一匹世界馬王。有邊個又會諗到霍利時之後會連續七季唔過21W，更加喺將近退休之年提早喺季中劈炮唔撈？

對上一位咁做嘅係曾經訓練出新加坡馬王「很簡單」嘅麥菲文，不過當年佢一嚟到就遇上罕見行馬機意外，喺唔適應香港之下迅速敗走。霍老爹話晒喺香港都有唔少大賽頭馬，因咩解究會落得如斯田地呢？我哋以下就總結咗六位嫌疑犯，要點判就交畀各位陪審團啦。



1. 自己
孔子都識講吾日三省吾身，冇成績就一定要反省吓自己有冇問題先。一位練馬師究竟練得好唔好，其中一樣可以睇佢熱門成績，畢竟最能夠量化馬匹爭勝機會嘅係賠率，尤其下游馬房好少會出現無厘頭大熱。

如果齋計上季，佢大熱勝出率只係得21%排尾五，但留意返佢大熱入位率高達71%排第3，14隻大熱有10隻上名，起碼唔會完全失準影都冇。對比某位得5% & 38%，全季21隻大熱贏得1隻嘅中游練馬師嚟講，表現絕對唔失禮。

咁佢又有冇啲咩質新馬係去唔到頂而達唔到期望呢？事實上佢馬房嘅高班馬例如「又係熊」、「滿冠熊」，中班嘅「水箭龜」、「戰熊三千」等等都叫做每季有貨交咁滯，甚至連大家睇低嘅「鑲白旗」實在都係3W馬，但至少你擺咗馬喺佢度，佢會畀到成績你。

既然佢冇咩唔好，咁點解成績都係差呢？或者就正正係因為佢冇咩唔好，亦都冇咩好，令到佢一直冇支持而徘徊低谷。喺香港稱上平庸或者平凡嘅練馬師絕非少數，但係大部份都係華倉，同聲同氣之下自然會容易得到馬主支持，姚本輝、呂健威都係咁樣捱出頭。

但洋倉嚟講同造星一樣都要有selling point，蔡、方、希斯sell勁；賀、蘇甚至高伯新PPG都偶有佳作，仲有潘頓加持；老苗辣操見稱；十三少有名氣夠實力。咁霍利時sell咩？截至19/12，佢養馬量（30隻）只係僅僅多過何良（29隻），甚至比鄭俊偉（33隻）少。

平庸嘅霍老要再搵突破唔太可能，但照計佢最多都係練多七季，碌過65歲其實唔係難事。不過觀乎霍老訪問嘅語氣，佢就有啲包袱放唔低。



2. 奧運馬房
細細個已經聽過奧運馬房嘅問題，馬會亦都就呢件事上面來來回回咗好多次。奧運馬房只係開咗十幾年，四個開荒元老入面，孫達志同胡森已經因為未能達標散倉，鄭俊偉上季就收咗第一封警告信，淨返嘅就係霍老。

不過實在又冇咩聽過霍老投訴奧運馬房，尤其家陣有埋游泳池，已經好咗好多。加上近兩季韋達喺嗰邊都能夠攞到40W，又練得出級際賽頭馬，再攞呢樣做理由似乎out咗少少。




3. 馬會
最值得討論相信就係馬會今季開始實行嘅五班政策。今季開始練馬師達標數字進一步提升，而且當中加咗項限制，就係要有至少14W（非從化倉）/16W（從化倉）係五班以上頭馬。

2020/21馬季霍利時一共有17場頭馬，但有6場都係喺五班攞到，換言之根據新規例佢會被視為不達標。對於近年越嚟越少支持嘅霍老嚟講，呢項限制無疑係雪上加霜。今季佢頭4W入面有兩場都係五班頭馬，換言之已經用晒呢個quota。而且佢廄內有成11隻都係45分以下馬，好大機會都係要瞄住五班嚟贏，今年唔達標嘅機率都可謂不低。

而且最具爭議嘅相信係，呢個機制究竟合唔合理？馬會從來都冇就呢件事出過新聞稿，呢啲事亦不嬲唔會主動公佈，所以實在馬會並無就呢個舉動背後目的進行解釋，最合理嘅猜想都係講「為咗提升香港馬匹質素」。

但一隻馬能力只能夠贏五班，究竟係練馬師、騎師定馬販嘅責任大啲呢？如果你相信至少係責任均等嘅話，係唔係應該都引入淘汰馬販制度呢？例如一個馬販長期引入全部都係五班馬，就剔除佢出名單之外呢？霍老對呢個制度嘅不滿絕不無道理。

最最最緊要嘅係，觀乎近年其實只得霍利時上季係會因為呢個制度而受害，喺冇明顯需要之下立例，難免會覺得馬會呢個條例針對性啄住佢，趕盡殺絕下游馬房，扼殺佢哋生存空間。華倉冇得揀但佢有，咁不如及早走人。



4. 南非馬壇
早幾年港澳馬會交惡，其中最大得益者就係南非馬壇，呢幾季南非自購馬數目激增，而且大部分都係由苗禮德同霍利時訓練，最成功嘅相信就係經典盃盟主「星洲司令」。

不過講嚟講去，其實就係得「星洲司令」，而且佢贏完經典盃之後就冇再贏過，其實講唔上成功。莫講話南非自購馬，南非馬近年都仲係講緊「繽紛會」同「卡通飛機」，情況同新加坡咁上緊。

「馬友冠」、「慈愛恩典」同「雪霸神駒」呢三匹得個名嘅C布南非PP，可以話係香港馬壇最大笑話。D布「令才」同「簹多福」亦唔好得幾多。霍老嘅同鄉苗禮德呢兩年成績都唔算好，同南非馬失色點都有啲關係。當你嘅「招牌貨」都收埋皮，咁霍老收埋皮都好似好合理。



5. 馬主們
呢幾年喺霍利時口中最常聽到嘅，就係話自己冇支持，就算練過「爪皇凌雨」都冇人畀馬佢練。雖然呢句說話同50年前賽跑冠軍個廣告有異曲同工之妙，但係佢近年養馬量的確係明顯減少，究竟係邊度出問題？

同霍老合作開嘅包括「熊」、「趣」、小精靈、「爪皇」同「睡眠」系，大馬主蕭生同「利多」系都一直有馬交比佢練，佢亦都交到成績畀人睇。主要流失嘅只係「金獅」同「妙星」系，後者養馬量算偏多，但總體嚟講問題唔算嚴重。

所以最大問題可能都係第一點講，霍利時近年自己食老本，又開始失去自己特色之下，吸引唔到新馬主嘅支持。



6. 某「超」級馬迷
曾經係胡森fans嘅佢，麥菲文當年嚟開倉，佢撐到散倉。呢位長期霍利時馬迷嘅動向，相信會係未來馬壇其中一個焦點……



延伸閱讀【告別霍利時】霍利時在港從練十八季 佢嘅威水史你聽過幾多？：https://bit.ly/3mi8aVx